ჩვენ ვპროგნოზირებდით, რომ ზაფხულის პერიოდში, როდესაც ტურისტული სეზონი შედის აქტიურ ფაზაში, მობილობა სერიოზულად გაზრდილია – შემთხვევების ზრდა გვექნებოდა, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ „ტვ პირველის“ ეთერში განაცხადა.
„შემთხვევების ზრდა დრამატული არ არის, ეს არის ის ციფრები რომელსაც ჯანდაცვის სექტორი კარგად მართავს, ეს არ არის საპანიკო და დიდი შეშფოთების საბაბი, მაგრამ ფრიად საყურადღებო. გვაქვს შემთხვევების დინამიური ზრდა. ხვალ დილისთვის ალბათ ისევ მოგვემატება ინფიცირებულთა რაოდენობა, რადგან რამდენიმე მნიშვნელოვანი კლასტერია ჩამოყალიბებული. ყველაზე დიდ ყურადღებას დღეს აჭარა იპყრობს და კერძოდ ბათუმი, სადაც ყველაზე დიდი, საკონდიტრო „დონას“ კლასტერი ჩამოყალიბდა.
ჩვენი სლოგანია: უნდა ვიცხოვროთ და მივეჩვიოთ კორონასთან ერთად ცხოვრებას. ეს ვირუსი არც დღეს და არც ხვალ არ გაქრება, მასთან ცხოვრება მინიმუმ ერთი წელი მოგვიწევს, ამიტომ ცხოვრება ვერ ჩაიკეტება, ეკონომიკა ვერ ჩაიკეტება, მათ შორის კულტურული ღონისძიებები. ჩვენ მოვეშვით, იმიტომ რომ შევიქმენით ილუზია, რომ საქართველომ კორონავირუსი დაამარცხა. ამიტომ არსად აღარ ატარებენ პირბადეს, არ იცავენ დისტანცია. თუ არ დავიცავთ რეკომენდაციებს, გვექნება მეორე და მესამე დიდი გამოწვევა. მეორე დიდი გამოწვევა იქნება როდესაც 15-ში სწავლა დაიწყება“, – განაცხადა ამირან გამყრელიძემ.