თბილისის მერია ფილარმონიის მიმდებარე ტერიტორიაზე მომხდარ აფეთქებასთან დაკავშირებით განცხადებას ავრცელებს.
როგორც თბილისის მერია იუწყება აფეთქების გამო კოსტავას ქუჩაზე საავტომობილო მოძრაობა დროებით შეზღუდულია.
„თბილისის საკონცერტო დარბაზის მიმდებარე ტერიტორიაზე მომხდარი აფეთქების გამო, კოსტავას ქუჩაზე საავტომობილო მოძრაობა შეზღუდულია.
საზოგადოებრივი ტრანსპორტი და კერძო ავტომობილების მძღოლები რუსთაველის გამზირის მიმართულებით ვერ გადაადგილდებიან, რაც მელიქიშვილის ქუჩიდან, ვარაზისხევიდან და ჭავჭავაძის გამზირიდან მომავალი სატრანსპორტო საშუალებების ნაკადების შეფერხებას იწვევს.
შემთხვევის ადგილზე შინაგან საქმეთა სამინისტროს თანამშრომლები არიან მობილიზებული“, – ნათქვამია განცხადებაში.
პირველადი ინფორმაციით, ფილარმონიასთან აფეთქების მიზეზი ჟანგბადის ბალონი გახდა. როგორც imedinews-ს საგანგებო სიტუაციების მართვის სამსახურში განუცხადეს, მუშები აწარმოებდნენ სამუშაოებს, რა დროსაც ჟანგბადის ბალონი აფეთქდა.
აფეთქების შედეგად 1 ადამიანი გარდაიცვალა, 2 კი დაშავდა. ადგილზე ამ დრომდე მობილიზებულია საპატრულო პოლიცია, სახანძრო – სამაშველო და სასწრაფო დახმარების ჯგუფები.