”დადგა დრო, რომ ჟურნალისტებიც უნდა მიესალმონ იმას, რომ ისეთი მოსისხლე, ლამის მტრებიც კი, როგორიც მე და მიშა სააკაშვილი ვიყავით ერთმანეთის მიმართ, გავხდით მოკავშირეები და თანამოაზრეები’’, – განაცხადა ყოფილმა დეპუტატმა გუბაზ სანიკიძემ ტელეკომპანია “პირველის” გადაცემა „რეაქციაში“.
9-წლიანი მმართველობის პერიოდში ყოფილი პრეზიდენტის – მიხეილ სააკაშვილის მისამართით გამოთქმული შეფასებების მიუხედავად, სანიკიძე ახლა განმარტავს, რომ პოლიტიკაში შეურაცხყოფა ხელოვნებაა და ამ ყველაფერს მხოლოდ და მხოლოდ სამშობლოს სიყვარულით აკეთებდა.
ღალატის ეტიმოლოგიაზე რომ იცოდე, – არის არაბული სიტყვა და ნიშნავს შეცდომას.
კი, მოღალატეს ვეძახდი. არც სხვა აკლებდა ხელს. მე, პირადად, ამას ჩემი ქვეყნისთვის ვაკეთებდი. პოლიტიკაში რაც შემშლია, რაც არ გამომსვლია და გამომსვლია, მხოლოდ და მხოლოდ გულწრფელობით განისაზღვრებოდა. ვებრძოდი სააკაშვილს? – ვებრძოდი პატიოსნად, ვებრძვი ივანიშვილს – ვებრძვი პატიოსნად. საეჭვო, იცით, როდის არის ადამიანი პოლიტიკაში? როდესაც ხელისუფლების დასაცავად იბრძვის. მე მიშას ვებრძოდი, როცა ის იყო ხელისუფლებაში. ახლა მიშასთან ერთად ვარ. თანამებრძოლები და თანამოაზრეები ვართ’’,-აღნიშნა სანიკიძემ.
შეგახსენებთ: გუბაზ სანიკიძემ მიხეილ სააკაშვილის გაპრემიერებას მხარი დაუჭირა.