მკლავჭიდის ეროვნული ნაკრების მწვრთნელი გენადი კვიკვინია ამბობს, რომ მკლავჭიდის ფედერაციის პრეზიდენტი სოსო ჯაჭვლიანი მწვრთნელების გათავისუფლებას აპირებს იმის გამო, რომ მათ თავიანთი პრემიებიდან თანხა არ გაუნაწილეს.
კვიკვინია ჰყვება, რომ სახელმწიფომ მწვრთნელებს დაუნიშნა პრემია – სპორტსმენის მიღწეული შედეგის და მოპოვებული თანხის 50%. მწვრთნელები კი ამ თანხიდან ნაწილ „მეგობრულად“ ფედერაციის პრეზიდენტს სოსო ჯაჭვლიანს აძლევდნენ.
ნაკრების მწვრთნელის თქმით, თავდაპირველად პრემიის განაწილების გადაწყვეტილება მიიღეს იქიდან გამომდინარე, რომ ჯაჭვლიანს სახელმწიფოსგან არც ხელფასი ჰქონდა დანიშნული და არც პრემიას იღებდა, და ჯაშვლიანის მუშაობითაც თავდაპირველად კმაყოფილები იყვნენ. თუმცა, მას შემდეგ ჯაჭვლიანს ფედერაციისთვის ყურადღება აღარ მიუქცევია და მწვრთნელებმაც გადაწყვიტეს პრემიებიდან თანხა აღარ გაენაწილებინათ.
„ეს კაცი არასრდოს ჩანდა დარბაზში, გამოჩნდებოდა ხოლმე მხოლოდ პრემიების პერიოდში და ბოლოს ვუთხარით, სოსო შენ ჩვენგან ვეღარაფერს მიიღებ“, – ამბობს კვიკვინია.
„ამის მერე ეს ადამიანი საერთოდ დაიკარგა, როგორც მანამდე არ ჩანდა ისე. დაიკარგა და ბოლოს წერილობით მოგვმართა, რომ პანდემიასთან დაკავშირებული პრობლემების გამო უნდა შევიკრიბოთ და რაღაც გადაწყვეტილებები უნდა მივიღოთო. თუმცა, იქვე ეწერა ასევე, „მწვრთნელების ჩანაცვლებასთან დაკავშირებითო“, – დასძენს ნაკრების მთავარი მწვრთნელი.
მკლავჭიდის ეროვნული ნაკრების მწვრთნელი ამბობს, რომ ჯაჭვლიანი მისი და კიდევ 3 მწვრთნელის სხვა მწვრთნელებით ჩანაცვლებას ხვალ გასამართ გამგეობის სხდომაზე აპირებს. ანაცვლებს იმ ხალხით, ვინც თავის დროზე ფედერაციიდან უმოქმედობის გამო გაუშვეს. ამ ეჭვის საფუძველი კი ისაა, რომ ჯაჭვლიანმა მათ სამწვრთნელო ლიცენზიები დაურიგა, როცა მათ – მოქმედ მწვრთნელებს, 3 წელია ამ ლიცენზიებს არ აძლევს.
„ისეთი ხალხით ჩაანაცვლებს, ვისთანაც ამ „ატკატზე“ საუბარიც არ ექნება. წინასწარ იქნებიან შეჯერებულები და მოლაპარაკებულები“, – ამბობს კვიკვინია.
ეროვნული ნაკრების მწვრთნელი ამბობს, რომ ჯაჭვლიანს მწვრთნელების გასათავისუფლებლად არგუმენტები არ აქვს. მკლავჭიდის ეროვნული ნაკრები ბოლო წლებია დიდი წარმატებით სარგებლობს და არაერთი მედალი მოიპოვა.
საქართველოს პარამკლავჭიდის მთავარი მწვრთნელი ვასილ დაუთაშვილი კი დასძენს, რომ მკლავჭიდის ფედერაციაში გადწყვეტილებებს იღებს სოსო ჯაჭვლიანი და გამგეობა, რომელშიც ისეთი წევრი არიან, ვისაც მკლავჭიდთან შეხებაც არ აქვს.
„ჰყავს გამგეობაში ხალხი, რომელთაც არ ვიცნობ, სპორტსმენებთან შეხება არ აქვს. იმან რა იცის, მე როგორ ვიმუშავე და ხვალ კი ხელი უნდა ასწიოს ჩემ გაშვებაზე. საერთოდ არ მიცნობს და რანაირად?! არავინ არ ჰყავს გამგეობაში ისეთი, რომ სპორტზე გული შესტკიოდეს“, – ამბობს დაუთაშვილი.