რამდენიმე წუთის წინ, განათლების სამინისტროსთან სწავლის გადადებით უკმაყოფილო მოსწავლეთა მშობლებმა და სკოლების დირექტორებმა აქცია გამართეს.
სამინისტროსთან შეკრებილთა ნაწილი აცხადებს, რომ ზოგიერთ სასწავლო დაწესებულებაში სწავლა უკვე ორი კვირაა, რაც დაიწყო და ისინი პანდემიითგამოწვეულ შეზღუდვებს მომზადებულები შეხვდნენ – განათლების სამინისტროს მიერ მოთხოვნილ რეგულაციებს სრულად აკმაყოფილებენ.
ამბობენ, რომ უსაფრთხო სწავლების უზრუნველყოფა შეუძლიათ. აქციის მონაწილეები აპროტესტებენ პრემიერის გადაწყვეტილებას და აცხადებენ, რომ არ შეიძლება ყველა სკოლისთვის ერთი და იგივე შეზღუდვების დაწესება.
მშობლები სწავლის საფასურის გადახდაზე ამახვილებენ ყურადღებას და ამბობენ, რომ სოლიდური თანხა არამიზნობრივად გადახდილი გამოდის, თუ მათი შვილები დისტანციურ სწავლებაზე გადავლენ.
ისინი ადასტურებენ, რომ სკოლებში, სადაც მათი შვილები სწავლობენ,უსაფრთხოების ყველა ზომა დაცულია.
აქციას შეუერთდა ახალი გიმნაზიის დირექტორიც. ის აცხადებს, რომ მის სკოლაში უსაფრთხო გარემოა შექმნილი და მოითხოვს სასწავლო დაწესებულებების დიფერენცირებას შექმნილი უსაფრთხოების გარემოს შეფასების საფუძველზე.
„ცოტა ხნის წინ, ცნობილი გახდა, რომ პრემიერის გადაწყვეტილებით, სწავლება დიდ ქალაქებში 1-ლ ოქტომბრამდე გადაიდო, რაც იმას ნიშნავს, რომ ჩვენი შვილები დისტანციური სწავლების რეჟიმზე გადადიან, მოკლედ რომ ვთქვა, დისტანციური სწავლება არის ბლეფი.
ამას არ გაუმართლებია და არც გაამართლებს.
ძალიან დიდი ფინანსური და ფიზიკური ხარჯი გავწიეთ იმისთვის, რომ ამათი მოთხოვნები შეგვესრულებინა და შეუსრულებადიც კი შევძელით, რათა მოსწავლეები მიგვეღო. ეს არასერიოზული დამოკიდებულებაა განათლების სისტემის მიმართ.
დისტანციური სწავლება რომ ვითომ მაღალ დონეზეა, არის თავის მოტყუება, არ არის მაღალ დონეზე.“ – ამბობს სკოლის დირექტორი.
შეგახსენებთ, პრემიერმინისტრისგადაწყვეტილებით, 15 სექტემბრის ნაცვლად, მსხვილ ქალაქებში საკლასო სწავლება 1-ლ ოქტომბერს განახლდება.
15 სექტემბრიდან კი, მოსწავლეებს დისტანციური რეჟიმით სწავლა მოუწევთ.