შვეიცარიის კონფედერაციაში საქართველოს საელჩო საქართველოს მოქალაქეთა საყურადღებოდ განცხადებას ავრცელებს.
როგორც განცხადებაშია აღნიშნული, შვეიცარიაში კორონავირუსის აქტიურად გავრცელების გათვალისწინებით, შვეიცარიის ფედერალურმა მთავრობამ ახალი გადაწყვეტილება მიიღო.
„14 სექტემბრიდან, მაღალი რისკის ქვეყნების სიას დაემატება შვეიცარიის მოსაზღვრე ქვეყნების ზოგიერთი რეგიონი. მაგალითად, ვენის რეგიონი, პარიზის რეგიონი და ასე შემდეგ. ამ რეგიონებიდან შვეიცარიაში შემოსვლის შემთხვევაში, მათ შორის პარიზიდან და ვენიდან საჰაერო თუ სახმელეთო გზით შემოსვლისას, 14 სექტემბრიდან სავალდებულო ხდება 10-დღიანი კარანტინის-თვითიზოლაციის გავლა. წესები ეხება ნებისმიერი ქვეყნის მოქალაქეს/რეზიდენტს, მათ შორის საქართველოს მოქალაქეებს.
შვეიცარიაში ჩამოსვლიდან ორი დღის ვადაში მოქალაქეს აქვს ვალდებულება, დაუკავშირდეს მიგრაციის სამსახურს მისი საცხოვრებელი კანტონის და ქალაქის მიხედვით და გააკეთოს განაცხადი ქვეყანაში შემოსვლის მარშრუტის შესახებ.
კარანტინის თავის არიდების შემთხვევაში დადგენილია ჯარიმა 10 000 ფრანკის ოდენობით.
საზღვარზე კოვიდ ტესტის ცნობები არ მოითხოვება, ვინაიდან კარანტინის გავლა სავალდებულოა ტესტის დადებითი ან უარყოფითი პასუხის მიუხედავად.
გთხოვთ მუდმივად თვალი ადევნოთ შვეიცარიის მთავრობის მიერ დადგენილ მაღალი და დაბალი რისკის ქვეყნების/ რეგიონების სიას, რომელიც დინამიურად იცვლება“, – აღნიშნულია განცხადებაში.
შვეიცარიის კონფედერაციაში საქართველოს საელჩო ავრცელებს შვეიცარიის მეზობელი ქვეყნების ზოგიერთი რეგიონის სიას, რომლებიც 14 სექტემბრის მდგომარეობით მაღალი რისკის არეალებად არის მიჩნეული.