ახმეტის მუნიციპალიტეტის, სოფელ მატანში მცხოვრები კაცის ქორწილში მყოფ 2 კონტაქტს კორონავირუსი აღმოაჩნდა.
Imedinews-ის ინფორმაციით, კაცს ქორწილი გორში 5 სექტემბერს ჰქონდა და მის მშობლებს ორგანიზმში ვირუსის არსებობა ლაბორატორიულად დაუდასტურდათ. ორივე მათგანი ტესტის პასუხებამდე სოფელში თვითიზოლაციაში იმყოფებოდა, თუმცა ისინი უკვე თბილისში, კოვიდკლინიკაში სპეციალიზირებული რეანომობილით გადაიყვანეს.
ეპიდემიოლოგები განმარტავენ, რომ ეს არის შემოტანილი და არ განიხილება კახეთის შემთხვევად. სპეციალისტები მოსახლეობას დაწესებული რეგულაციებისა და წესების დაცვისკენ მოუწოდებენ.
ამ დროისთვის საქართველოში კორონავირუსის 2227 შემთხვევაა დადასტურებული. განკურნებულთა რაოდენობა კი 1 369-ს შეადგენს. კორონავირუსის შედეგად ქვეყანაში 19 პაციენტი გარდაიცვალა.
კარანტინის რეჟიმში იმყოფება 5882 მოქალაქე, ხოლო სტაციონარში მეთვალყურეობის ქვეშ – 390. უცხოეთიდან სამკურნალოდ გადმოყვანილია საქართველოს 41 მოქალაქე.