გარდაცვლილი ერეკლე თედლიაშვილის ოჯახის ადვოკატის, თამარ თედლიაშვილის განცხადებით, გარდაცვლილის ოჯახს კითხვები აქვს სამედიცინო პერსონალთან. მათთვის გაუგებარია, რატომ მოხდა მომაკვდავი პაციენტის რეაბილიტაციის ცენტრში გადაყვანა, სადაც 18 წლის მოზარდი ისე დამძიმდა, რომ კლინიკაში დააბრუნეს.
„არ ვიცით ნებით მოხდა თუ უნებლიეთ, მაგრამ კლინიკის ექიმებმა მიიღეს გადაწყვეტილება ერეკლე რეანიმაციიდან გაეწერათ და გადაეყვანათ სარეაბილიტაციოდ. ფაქტობრივად, მომაკვდავი ბავშვი გაწერა კლინიკამ სარეაბილიტაციოდ. ორ დღეში დამძიმდა მისი მდგომარეობა და შედეგი მივიღეთ უმძიმესი. დღეს არის ერეკლეს დაკრძალვა. როგორც კი გაივლის ეს უმძიმესი დღეები ოჯახი ყველა საკითხით დაინტერესდება, როგორც სამართლებრივად, ისე სამედიცინო კუთხით და მოითხოვს შესაბამის ახსნა-განმარტებებს“, – განაცხადა ოჯახის ადვოკატმა, თამარ თედლიაშვილმა.
დღესვე, გორის რაიონულ სასამართლოში აღნიშნულ საქმეზე ბრალდებულის, თარაშ კანდელაკის პირველი სასამართლო პროცესი გაიმართება.
ერეკლე თედლიაშვილი გორში მომხდარი ჩხუბისას დაშავდა, ის 12 სექტემბერს კლინიკაში გარდაიცვალა.