გორში ინტოქსიკაციის ნიშნებით კლინიკა “იავნანას”, გასული 24 საათის განმავლობაში, კიდევ 53-მა არასრულწლოვანმა მიმართა.
ექიმის განცხადებით, პაციენტებს კვლავ იგივე სიმპტომები, დიარეა და პირღებინება აღენიშნებათ. ლია ლაზარაძის თქმით, ამ დროისთვის სტაციონარში 26 პაციენტი რჩება, მათი ჯანმრთელობის მდგომარეობა მსუბუქი და საშუალო სიმძიმისა. გაზრდილია მასშტაბებიც – გუშინ, თუ თითქმის ერთი უბნის პაციენტებს ჰქონდათ ჩივილები, ახლა პაციენტები უკვე გორის რაიონის სოფლებიდანაც მოჰყავთ.
ექიმი ასევე აცხადებს, რომ პაციენტების ნაწილი მათთან კომბინატიდან არიან შესული, ნაწილი კი სოფლებიდან.
“დღევანდელ დღეს, გაკვეთილისთვის 86 მოსწავლე არ გამოცხადებულა, მშობლები ამბობენ, რომ მათი შვილები მოწამლულები არიან და სწორედ ამ მიზეზით ვერ მოვიდნენ გაკვეთილებზე,”- აცხადებს სკოლის დირექტორი.