ხალხმა დაიწყო გადაწყვეტილების მიღება, დაიწყო ახლის ძიება და საკმაო რაოდენობამ არც მოქმედ და არც წინა ხელისუფლებას მისცა ხმა. ხმები გადანაწილდა „გირჩზე“, „აღმაშენებელზე“, „ლელოზე“. ასეთები ბევრნი არ ვართ, მაგრამ ჩვენ ვენდეთ ამ ადამიანებს და ისინი ახლა ისევ მიშასთან გადაგვამისამართებენ? , – ამის შესახებ ტელეკომპანია „იმედის“ გადაცემაში „არენა“ პოეტმა, დავით მაღრაძემ განაცხადა.
„გავეცანი ჩვენი ყველაზე მტკიცე და ძლიერი სტრატეგიული პარტნიორის, აშშ-ის სახელმწიფო დეპარტამენტის განცხადებას, სადაც ნათქვამია, რომ არჩევნები იყო კონკურენტული და დაცული იყო ადამიანის ფუნდამენტური თავისუფლებები. მე, როგორც საქართველოს მოქალაქეს, მაქვს უფლება და სურვილი, ვენდო აშშ-ის სახელმწიფო დეპარტამენტის განცხადებას. მოვისმინე აშშ-ის ელჩის განცხადებაც, საერთაშორისო მისიების დასკვნებიც და ყველა ამბობს, რომ ხარვეზების გათვალისწინებით არჩევნები დემოკრატიულ, თავისუფალ გარემოში ჩატარდა. ოპოზიციის ნაწილი თავიდანვე აცხადებდა, რომ ეს პროცესი უპირობო პროტესტში გადაიზრდებოდა, თუ ცესკო მათთვის სასურველ შედეგებს არ გამოაცხადებდა. რაც „ნაციონალურ მოძრაობას“ შეეხება, ხელისუფლებაში იყო და საფრთხეს წარმოადგენდა მუდამ – თავისი რყევებით, სახელმწიფოს ინტერესების ფეხქვეშ გათელვით და ა.შ., ახლა ოპოზიციაშია და აქაც საფრთხეს წარმოადგენს მუდამ. მინდა მივმართო, როგორც მოქალაქემ, იმ პარტიებს, რომელსაც სააკაშვილი „პარტიუკებს“ ეძახის, მაგრამ მე არ მინდა ასე შეურაცხმყოფელად მივმართო, იმიტომ რომ მათ უკან არიან ამომრჩევლები. როგორც იქნა, ხალხმა დაიწყო გადაწყვეტილების მიღება, დაიწყო ახლის ძიება და საკმაო რაოდენობამ არც მოქმედ და არც წინა ხელისუფლებას მისცა ხმა. ხმები გადანაწილდა „გირჩზე“, „აღმაშენებელზე“, „ლელოზე“. ასეთები ბევრნი არ ვართ, მაგრამ ჩვენ ვენდეთ ამ ადამიანებს და ისინი ახლა ისევ მიშასთან გადაგვამისამართებენ? მათ ამის მორალური უფლება ჰქონდათ? სააკაშვილმა დაამწკრივა ისინი სანიმუშო ჯარისკაცებივით და პარლამენტში შესვლა აუკრძალა. ამ პარტიების ამომრჩეველთა იმედგაცრუება არ შეიძლება – თუ საკუთარი ამომრჩევლის ნდობასაც აღარ ითვალისწინება და მარტო სააკაშვილის მოთხოვნაა თქვენთვის კანონი, ეს სხვა საკითხია. „მარშალის გეგმით“ მოდიოდით თუ „მარშალ სააკაშვილის გეგმით“?“, – აცხადებს მაღრაძე.