აქციაზე სხეულის დაზიანება მიიღო სამმა პიროვნებამ. მათ შორის, ერთი ჟურნალისტია, ერთი შს სამინისტროს ოპერატორი და ერთი კი, ერთ-ერთი ოპოზიციური პარტიის წარმომადგენელი, – ამის შესახებ აჭარის პოლიციის დეპარტამენტის უფროსმა, კოტე ანანიაშვილმა „ღია ეთერში“ განაცხადა.
მისი თქმით, საოლქო კომისიის მიმდინარედ ჩაიმსხვრა მინის კონსტრუქცია, რა დროსაც მოქალაქეებმა მიიღეს დაზიანებები.
„რაც შეეხება ფაქტს, ბათუმის საოლქო კომისიის შენობის ტერიტორიაზე შინაგან საქმეთა სამინისტროს საპოლიციო ძალები იცავდნენ წესრიგს, გარკვეული ოპოზიციური პარტიის წარმომადგენლები და მოქალაქეთა ჯგუფები ცდილობდნენ ძალისმიერი გზით შეეღწიათ საოლქო კომისიაში. აღნიშნული ინციდენტის დროს, ჩაიმსხვრა მინის კონსტრუქცია, რა დროსაც მოქალაქეებმა მიიღეს დაზიანებები. როდესაც დაშორიშორება მოხდა მოქალაქეთა ჯგუფებსა და პოლიციას შორის მოხდა იდენტიფიცირება მათი, ვისაც შესაბამისი აკრედიტაცია ჰქონდა საოლქო კომისიაში შესვლის. ჩვენ არაერთხელ განვუმარტეთ, რომ მოეცათ საშუალება, შეგვეშვა ეს პირები, მაგრამ გარკვეული ჯგუფები ცდილობდნენ ფიზიკური ზემოქმედებით მოეხდინათ შესვლა შიგნით და პოლიციის კორდონი შესაბამისად იყო მობილიზებული მიმდებარე ტერიტორიაზე და ჩვენ ამის საშუალება არ მივეცით, რა დროსაც მოხდა ინციდენტი“, – განაცხადა კოტე ანანიაშვილმა.