ორიოდე დღის წინ გამოჩნდა ცნობა COVID-19 -ის ვაქცინის შექმნის შესახებ, რომელიც ამ ვირუსის გავრცელების რისკს 90%-ით ამცირებს. ვაქცინა დასავლეთშია შექმნილი და კვლევის მესამე ფაზაც წარმატებით გაიარა. მთელს მსოფლიოში ამასთან დაკავშირებით დიდი მოლოდინები და იმედი გაჩნდა. თუმცა, თუკი რუსულ პროპაგანდისტულ მედიასაშუალებებს დავაკვირდებით, კრემლში ამ სიხარულს არ იზიარებენ. ეს გასაკვირიც კი არ არის, რადგან რუსმა მეცნიერებმა ჯერ კიდევ გაზაფხულზე გამოიგონეს „პანაცეა“, სახელად – Sputnik V, რომლითაც თვით ვლადიმერ პუტინი და მისი ოჯახი აიცრნენ. რა თქმა უნდა, კრემლის ელიტაც. პუტინს იმდენად უნდოდა, ეჩვენებინა მსოფლიოსთვის, რომ პლანეტის გადარჩენა მხოლოდ რუსეთს შეუძლია, რომ კვლევების მესამე – უმთავრეს ფაზასაც კი არ დაელოდა და Sputnik V-ს სახელმწიფო რეგისტრაცია ისე მიანიჭა. ცოტა ხნის წინ კი ამ ვაქცინით აცრილების დაღუპვის შესახებ ინფორმაციამ გაჟონა.
დღეის მდგომარეობით, რუსეთის ფედერაციაში 1,76 მილიონი დაავადებულია, 30 ათასზე მეტი ადამიანი – გარდაცვლილი. საგანგაშო მდგომარეობაა ჯანდაცვის სექტორში, რადგან COVID-19 -ის პირველი ტალღის შემდეგ ადამიანების დახმარების მაგივრად ვლადიმერ პუტინმა მილიარდობით რუბლი ისეთ პროექტებს მოახმარა, როგორიცაა მსოფლიოში ყველაზე დიდი ყინულმჭრელი გემის – „ვიქტორ ჩერნომირდინის“ არქტიკაში გაშვება.
ამ დროს კი, მაგალითად, როსტოვის საავადმყოფოში ერთდროულად 13 პაციენტი გარდაიცვალა, რადგან მედიკოსებს მათთვის საჭირო ჟანგბადის მიწოდება უეცრად შეუწყდათ. „ღამის 11:10-დან 12:10-მდე მამაჩემი მე-20 საავადმყოფოს რეანიმაციის განყოფილებაში იწვა. ჟანგბადი, დაახლოებით, 23:00 საათზე გამორთეს, დაახლოებით, 55 წუთს არ მიეწოდებოდათ. ამ დროს დედაჩემი კოვიდის განყოფილებაში იწვა, ჟანგბადის უკმარისობისგან ხალხი ყვიროდა! იმ ღამით მამა გარდაიცვალა, ის 56 წლის იყო. ვუსურვებ ყველას, ვინც ამაშია დამნაშავე, იგრძნოს ის ტკივილი და შიში, რაც მამაჩემმა განიცადა”, – დაწერა ერთ-ერთი გარდაცვლილის შვილმა. ექიმები ავადმყოფებს ვერაფრით შველოდნენ. მათი გადმოცემით, ადამიანები თევზებივით აღებდნენ პირს ჰაერის ჩასაყლაპად მაშინ, როცა ყვირილი უკვე აღარ შეეძლოთ.
თუმცა, რეგიონული ხელისუფლება კვლავ უარყოფს, რომ 11-12 ოქტომბრის ღამეს “მე-20 საქალაქო საავადმყოფოს” ბაზაზე განლაგებულ კოვიდ ჰოსპიტალში, ინტენსიური თერაპიის განყოფილებაში ჟანგბადის მიწოდების შეფერხებების შედეგად პაციენტები გარდაიცვალნენ.
ამას გარდა, გავრცელდა ვიდეოკადრები ტომსკის მეორე სამედიცინო და სანიტარული განყოფილებიდან, სადაც კორონავირუსით დაავადებულ პაციენტებს მკურნალობენ.