აღმოსავლეთ ჩინეთში, ქალაქ ძინანში იმპორტირებულ საქონლის ხორცზე და ხორცპროდუქტების შეფუთვებზე კორონავირუსი აღმოაჩინეს, – ამის შესახებ Reuters-ი წერს.
პროდუქტები, რომელზეც ვირუსი აღმოჩნდა, ჩინეთში ბრაზილიიდან, ახალი ზელანდიიდან და ბოლივიიდანაა შეტანილი. ჯერჯერობით, არ ასახელებენ კომპანიებს, რომელთა ხორცპროდუქტებზე ვირუსი აღმოაჩინეს, თუმცა ცნობილია იმპორტიორი კომპანიები – Guotai International Group-ი და Shanghai Zhongli Development Trade-ი.
ტესტირება უკვე ჩაუტარდა 7,500-ზე მეტ ადამიანს, რომელთაც, შესაძლოა, კონტაქტი ჰქონოდათ დაბინძურებულ პროდუქტებთან, თუმცა, მათ ვირუსი არ დაუდგინდათ.
ჩინეთი მსოფლიოში საქონლის ხორცის ყველაზე მსხვილი შემსყიდველი ქვეყანაა, ხოლო ბრაზილია და არგენტინა მისი უმსხვილესი მომწოდებლები არიან.
მსოფლიო ჯანდაცვის ორგანიზაციის განცხადებით, გაყინული საკვებიდან COVID-19-ით დაინფიცირების რისკი დაბალია, მაგრამ ჩინეთმა უკვე არაერთხელ გააჟღერა ინფორმაცია იმპორტირებულ საკვებ პროდუქტებზე ვირუსის აღმოჩენის შესახებ.