“დღევანდელ მსოფლიოს ბურჯანაძე-ბოკერიასა და ელისაშვილ-ბესელიას პრობლემებზე სალაპარაკოდ არ სცალია”.
მაიკ პომპეოს ვიზიტის შემდეგ ქართული ოპოზიციის შემდგომ ნაბიჯებსა და კავკასიაში შექმნილ ახალ გეოპოლიტიკურ ვითარებაზე ,,კვირა“ კინორეჟისორ გოგა ხაინდრავას ესაუბრა:
-ამერიკის შეერთებული შტატების სახელმწიფო მდივნის ვიზიტის შემდეგ, ქართული ოპოზიცია განსაკუთრებით მძიმე მდგომარეობაში აღმოჩნდა. მოსალოდნელია, რომ ოპოზიცია გადაწყვეტილებას შეცვლის და პარლამენტში შევა?
-ოპოზიცია ახლა მძიმე ჭაობშია, რომელიც საკუთარ თავს თავადვე შეუქმნა. მე ერთი რამ ვერ გამიგია – ყველა რატომ ჩახტა ,,ნაციონალური მოძრაობის“ ნავში და ყველა რატომ თამაშობს იმ დღის წესრიგით, რომელსაც მომავალი არ აქვს? თანამედროვე მსოფლიო დღეს არც ბრმაა და არც – ყრუ. როდესაც ეგზიტპოლის შედეგები ემთხვევა ამომრჩევლის ხმების რაოდენობას, იქ გაყალბება გამორიცხულია. არჩევნების გაყალბება 2008 წელს იყო თუ იყო. პარალელურ სამყაროში მყოფი ხალხის გარდა, 2020 წლის არჩევნების გაყალბების არავის სჯერა, გარდა – მეიასაროსკიპოებში მჯდომი ხალხისა, რომლებიც ვნებებს იკმაყოფილებენ საკუთარ ტელევიზიებში. ამ პროცესს პროსტიტუციის გარდა ვერაფერს დავარქმევ, რადგან ვნებების დაკმაყოფილება გონებითაც შეიძლება და მეტყველებითაც… მე ის მაკვირვებს, ახალგაზრდები როგორ წამოეგნენ ამ ანკესს და როგორ ჩაჰყვნენ ოპოზიციას იმ ჭაობში, საიდანაც ვეღარ ამოდიან.
-პარლამენტში შეუსვლელობის მტკიცე გადაწყვეტილებას აანონსებენ ის პარტიებიც, რომლებმაც 1%-იანი ბარიერიც ვერ გადალახეს.
-ჰო, დიდი ტრაგედიაა ბურჯანაძის პარლამენტში არშესვლა ქართველი ერისთვის, რომელიც უამისოდაც პარლამენტში ვეღარ დაბრუნდება. აბა, დააკვირდით ქართული ოპოზიციის ჭაობს, ბურჯანაძე- ნათელაშვილი-,,ნაციონალური მოძრაობის“ ერთობას. თუ ქალბატონ ნინოს ჰგონია, რომ საკუთარი ,,ინსტაგრამის,, გვერდიდან პუტინის სურათების მოშორება და ბაიდენის სურათების გამოფენა პროამერიკელსა და პროდასავლელს გახდის, ძალიან ცდება. ყველას ყველაფერი ახსოვს და საქართველოშიც ისე არ ბნელა, როგორც მაგათ უნდა, რომ ბნელოდეს. მაიკ პომპეოს ვიზიტმა ცხადყო, რომ ოპოზიციური ზრახვების განხორციელებას საქართველოში ამერიკა არ დაუშვებს?
-კერძოდ, რომელ ოპოზიციურ ზრახვებს?
– დესტაბილიზაციის მცდელობას საქართველოში ამერიკის შეერთებული შტატები არ დაუშვებს. კავკასიის რეგიონი ისედაც ძალზე არასტაბილური გახდა. ამერიკის ერთადერთ სანდო მოკავშირედ ახლა მხოლოდ საქართველო განიხილება. ჩვენს ქვეყანას არასდროს ჰყოლია ისეთი პროამერიკული ხელისუფლება, როგორიც ახლა ჰყავს. სააკაშვილი აქაც და უკრაინაშიც პრორუსული ძალაა და ეს სადავო უკვე აღარავისთვისაა. ასე რომ, ამერიკელები ერთადერთ მშვიდ ქვეყანას რეგიონში რუსებსა და სააკაშვილს თავდაყირა არ დააყენებინებენ. იცის ამერიკამ, ვისთან ითანამშრომლოს.
-ოპოზიცია ერთიანობას შეინარჩუნებს და ქუჩაში დარჩება?
-ვინც ქუჩაში აპირებს დარჩენას, მათი ადგილი ისედაც ქუჩაშია. მაჭუტაძე და ბაჩუკი ქარდავა სხვაგან სად უნდა იდგნენ? დანარჩენები ერთმანეთს შეასწრებენ პარლამენტში. დააკვირდით, რა ხდება მეორე ტურის არჩევნებში, სადაც ოპოზიციამ საკუთარი კანდიდატები მოხსნა. იცოდნენ, რომ ისედაც ვერ გაიარჯვებდნენ და ,,დემონსტრატიულად განრისებულებმა“ დატოვეს ბრძოლის ველი. თუ პროტესტი უნდოდათ, რატომ პარტიული სიები არ მოხსნენს? მაგას ვინ მოახსნევინებდათ, იმდენი ფული ჰქონდათ გამარჯვებისთვის ჩაყრილი. ვინ აპატიებთ აქ ჩადებული ფულის წყალში გადაყრას? ბარამიძესა და გოგორიშვილს პარლმენტში შესვლას ვინ დაასწრებს, მთელი ცხოვრება ბიუჯეტის ჭიებად დაზრდილ ,,პოლიტიკოსებს?“
-2020 წლის საარჩევნო პროცესსა და დამდგარ შედეგს როგორ შეაფასებდით?
-ამ არჩევნებში 8 პარტიამ მოიპოვა საპარლამენტო მანდატი. 27% მხოლოდ ,,ნაციონალურმა მოძრაობამ“ მოიპოვა. 3-4 თვის შექმნილმა პარტიებმა კი ბარიერი გადალახეს და გარკვეული მანდატების რაოდენობა მიიღეს. მსოფლიოში სად ხდება ასეთი რამ? თუ ახლა ოპოზიცია უღალატებს ამომრჩეველს, რომელმაც ის გარკვეული მიზნების გასახორციელებლად შეიყვანა პარლამენტში, საკუთარი მომხრეების დიდ ნაწილს სამუდამოდ დაკარგავენ. ვინც ამომრჩეველს უარს ეუბნება, პასუხიც მყისიერად უბრუნდება.
-იმ შემთხვევაში, თუ ოპოზიცია მართლა არ შევა პარლამენტში, ერთპარტიულ პარლამენტს მივიღებთ, რაც გარკვეულ უხერხულობებს შექმნის…
-უხერხული ვისთვის იქნება? მოსახლეობას რომ ერთპარტიული პარლამენტი აერჩია, მაშინ იქნებოდა უხერხული, მართლაც არ იქნებოდა კარგი განცდა. ეს ნებაყოფლობითი ჭაობი თუ არ შევა პარლამენტში, დიდი არაფერი დაშავდება, ჩვენს ქვეყანასაც მოვუვლით უმაგათოდ და – ყველა პრობლემასაც. მომავალ წელს ადგილობრივი თვითმმართველობის არჩევნები იქნება, შემდეგ კიდევ – მერების არჩევნები. ასე რომ, წინ საინტერესო პროცესები გველის.
-რეგიონში საქართველოს გეოპოლიტიკური ფუნქცია ყარაბაღის ომის შედეგებმა ძლიერ შეარყია?
-უმეცრებაა ამგვარად აზროვნება. დღეს მართლა ჰგონია ვინმეს, რომ სომხურ-აზერბაიჯანულ გზაზე რომელიმე ჭკუათმყოფელი ქვეყანა ან ბიზნესმენი თავის ფულს ჩადებს და ნავთობსადენს გაჭრის? რა მოიგო რუსეთმა? თუ აქამდე მთელი ყარაბაღი რუსეთის კონტროლის ქვეში იყო, ახლა მისი ტერიტორიის 2/3-საც ვეღარ აკონტროლებს. სომხეთმა, რომელიც მთელი ცხოვრება რუსეთის სატელიტი იყო, ალბათ, ახლა მაინც ისწავლა ჭკუა, რა შედეგი შეიძლება, მოუტანოს მთელი ცხოვრება ნებაყოფლობით სხვისი ჩექმის ქვეშ ყოფნას.
-სომხეთი, ალბათ, არაფრით ელოდა საკუთარი სტრატეგიული მოკავშირისგან ამგვარ ,,ღალატს“. სომხური საზოგადოება, პოლიტიკოსები და მედია აღშფოთებას ვერ მალავენ ,,ჩაბარებული“ ყარაბაღის გამო…
-რუსეთი აუცილებლად დაალევინებს სომხეთს ,,ცივ წყალს“ და ამ უკმაყოფილებასაც ჩახშობს. თუმცა, ჩვენი მეზობლები ახლა მართლაც ურთულეს მდგომარეობაში არიან ლტოლვილთა დიდი ნაკადისა და ეკონომიკური კრიზისის გამო. საფრანგეთის პრემიერმინისტრი ყარაბაღში ავტონომიურ მმართველობას მოითხოვს, ამერიკაში აცხადებენ, რომ საპრეზიდენტო არჩევნებისას დიდი აფიორა განხორციელდა. ასე რომ, ბურჯანაძე-ბოკერიასა და ბესელია-ელისაშვილის ალიანსებისა და პოლიტიკური ჭაობისთვის მერწმუნეთ, დღეს მსოფლიოს არ სცალია. რადგან თავად გადაწყვიტეს, რომ მათი ადგილი სწორედ აქ არის, დაე, დარჩნენ ამ პოლიტიკურ ჭაობში, დანარჩენებმა კი განვაგრძოთ ცხოვრება.
