ახალციხეში, სოფელ წყალთბილაში, კოვიდინფიცირებული მამა-შვილი გარდაიცვალა. ოჯახის წევრებისა და ექიმის თქმით, კლინიკაში მისულ კაცს მიღებაზე უარი უთხრეს.
„მომაკვდავი გოგო სახლში იყო, მამამისი წავიდა მეორე შვილთან ერთად საავადმყოფოში, იქ უთხრეს, რომ გიორგობის დღესასწაულის გამო ექიმები არ იყვნენ და უკან ტაქსით წამოვიდნენ. გუშინწინ გოგო მოკვდა, გუშინ დილით კი – თვითონ“, – ამბობს გარდაცვლილის ნათესავი, ლიდა პოღოსოაინი ტელეკომპანია „რუსთავი 2-თან“ საუბრისას.
ექიმის, ვაჰან ვაჰანიანის თქმით, კოვიდინფიცირებული მამა-შვილი თავად გასინჯა, სასწრაფო დახმარება გამოიძახა და ახალციხის კლინიკაში გაგზავნა.
„სასწრაფო დახმარების ბრიგადა სახლში არ შევიდა, ოჯახის წევრებს უთხრეს, რომ პაციენტი კლინიკაში თავად უნდა მისულიყო.
მოხუცი ახალციხის რეფერალურ ჰოსპიტალში თანასოფლელებმა წაიყვანეს, ექთნებს უთქვამთ, რომ ადგილები არ ჰქონდათ, ამის შემდეგ უკან გამობრუნდა,“ – ამბობს ექიმი.