დღეს ჩვენ დავამტკიცეთ რამდენიმე ცვლილება „აწარმოე საქართველოში“ პროგრამის სხვადასხვა კომპონენტში. პირველ რიგში ეს ცვლილება ეხება რესტორნების ინდუსტრიას, რაც მოიცავს სესხის და ლიზინგის პროცენტის სუბსიდირებას. განაცხადების მიღება ხვალიდან დაიწყება, – ამის შესახებ ეკონომიკის მინისტრმა, ნათია თურნავამ მთავრობის ადმინისტრაციაში გამართული სხდომის შემდეგ გამართულ ბრიფინგზე განაცხადა.
მისი თქმით, „აწარმოე საქართველოს“ პროგრამაში ასევე ჩაერთვებიან ივენთ კომპანიები და კინოთეატრები და სახელმწიფო მათ მაქსიმალურად დაეხმარება.
როგორც თურნავამ აღნიშნა, სახელმწიფო სარესტორნო ინდუსტრიის დახმარებისთვის დაახლოებით 30 მილიონ ლარს გამოყოფს.
„დღეს ჩვენ დავამტკიცეთ რამდენიმე ცვლილება „აწარმოე საქართველოში“ პროგრამის სხვადასხვა კომპონენტში. პირველ რიგში ეს ცვლილება მოიცავს რესტორნების ინდუსტრიას, რაც მოიცავს სესხის და ლიზინგის პროცენტის სუბსიდირებას. განაცხადების მიღება ხვალიდან დაიწყება, რადგან ჩვენ ძალიან კარგად გვესმის, რომ სარესტორნო ინდუსტრია პანდემიიდან გამომდინარე არის მძიმე მდგომარეობაში და ჩვენ მაქსიმალურად სწრაფად გვიდნა, რომ შევუმსუბუქოთ მათ საბანკო სესხების ტვირთი. ამ პროგრამის მეშვეობით, თითქმის სრულად საბანკო სესხის პროცენტის ტვირთს უახლოეს 6 თვეში პრაქტიკულად ვერ იგრძნობენ. მინდა ვთქვა, რომ ეს იყო მოთხოვნა, რასაც რესტორნების ასოციაცია ჩვენთან ძალიან აქტიურად აყენებდა და საბოლოო ჯამში ეს მათთვის ძალიან მნიშვნელოვანი დახმარება იქნება, ასევე შეგახსენებთ, რომ მთავრობა სხვა მიმართულებითაც ეხმარება რესტორნებს, ისევე როგორც მთლიანად ტურისტულ სექტორს, ეს არის უპრეცედენტო საგადასახადო შეღავათები, რადგან ამ დარგისთვის კეთდება ქონების გადასახადის 4 თვის პრაქტიკულად ჩამოწერა და მთლიანად 2021 წლის ქონების გადასახადისგან გათავისუფლება, ასევე საშემოსავლო გადასახადში ნაწილობრივ გადავადება და პატიება და შემდეგ უკვე შეღავათები 1,500 ლარამდე ხელფასის მქონე ადამიანებისთვის“, – განაცხადა ეკონომიკის მინისტრმა.
ეკონომიკის მინისტრმა „აწარმოე საქართველოში“ შემოტანილ სხვა ცვლილებებზეც ისაუბრა.
„სხვა ცვლილებები, რაც შემოქვაგვს ეხება ივენთ კომპანიებს ჩვენ მათზე ასევე გავავრცელეთ სესხის პროცენტის სუბსიდირების პროგრამა და ახლა შემოგვაქვს ლიზინგის პროცენტის სუბსიდირება, რადგან მათ მოგვმართეს თხოვნით და გარკვეული ინვენტარი მათ აქვთ ლიზინგით შეძენილი. ასევე ამავე პროგრამაში შემოგვყავს კინოთეატრები და მათაც გვერდში დავუდგებით და დავეხმარებით.
დაახლოებით ვვარაუდობთ, რომ 6 თვის განმავლობაში 30 მილიონი ლარი იქნება რესტორნების დახმარებისთვის გამოყოფილი და სულ მცირე 1,500-მდე ორგანიზაცია, რესტორანი შეძლებს, რომ ისარგებლოს ამ დახმარებით“, – განაცხადა თურნავამ.