შერიგებისა და სამოქალაქო თანასწორობის საკითხებში სახელმწიფო მინისტრი თეა ახვლედიანი აცხადებს, რომ ოკუპირებული ცხინვალის რეგიონში მცხოვრებ მოსახლეობას კვლავ არ ეძლევა გადაუდებელი სამედიცინო დახმარებით სარგებლობის უფლება.
„სამწუხაროდ, ამ დრომდე სრულიად ჩაკეტილი და ხელოვნურად იზოლირებული რჩება ცხინვალის რეგიონი. უკვე ერთ წელიწადზე მეტია, რაც დაკეტილია ახალგორის მიმართულებით ე.წ. გადასასვლელი პუნქტი და ადგილობრივ მოსახლეობას აკრძალული აქვს თავისუფალი გადაადგილების უფლება. საუბედუროდ, ამ რეჟიმმა უკვე შეიწირა 16 ადამიანის სიცოცხლე, რომელთაც არ მიეცათ გადაუდებელი სამედიცინო დახმარებით სარგებლობის უფლება ან რეაგირება უკვე დაგვიანებული იყო. ჟენევის საერთაშორისო მოლაპარაკებებზე საქართველოს დელეგაციამ მთელი სიმწვავით დააყენა ადგილობრივი მოსახლეობის მძიმე ჰუმანიტარული მდგომარეობისა და ოკუპირებულ ტერიტორიებზე დარჩენილი ქართველების ეთნიკური დისკრიმინაციის საკითხი. ჩვენ ვაგრძელებთ ამ მიმართულებით მუშაობას, საერთაშორისო პარტნიორებთან ერთად“, – განაცხადა ახვლედიანმა.