ცაგერის მუნიციპალიტეტის სოფელ ჩქუმის თავზე ტყის ქვედა საფარი იწვის, – ამის შესახებ ინფორმაციას ცაგერის მუნიციპალიტეტი სოციალურ ქსელში ავრცელებს.
ცეცხლი 15 ჰა-ზეა გავრცელებული და ადგილზე მეხანძრე-მაშველები არიან მობილიზებული.
„ცეცხლი ეკალ-ბარდებს, გამხმარ ფოთლებსა და შერეულ ტყეს გაუჩნდა. ცაგერის საგანგებო სიტუაციების მართვის სამსახურის მეხანძრეთა ბრიგადები ცეცხლის ლოკალიზებას ცდილობენ, თუმცა, საქმეს ართულებს ის, რომ ძლიერი ქარია და შესაძლოა, ცეცხლი მეტად გავრცელდეს. რადგან სახანძრო მანქანები ვერ ახერხებენ ტერიტორიაზე შესვლას, მეხანძრეები იძულებული არიან ფეხით გადაადგილდნენ. მათ ადგილობრივი მოსახლეობაც ეხმარებათ“, – აცხადებენ მუნიციპალიტეტში.
მათივე ინფორმაციით, ასევე, ხანძარია სოფელ თაბორის თავზე, სადაც ტყის მასივი იწვის.
„ცეცხლი რთულად მისადგომ ადგილზეა, სიბნელე და ქარი ართულებს მდგომარეობას. შესაძლოა, საჭირო გახდეს ვერტმფრენის ჩართვა. ამ დროისათვის ცეცხლის ლოკალიზება ვერ ხერხდება. რეგიონში მსგავსი სიტუაციაა ონის მუნიციპალიტეტშიც. რამდენიმე დღის წინ ხანძარი იყო ორბელის უღელტეხილზეც, რომლის ლოკალიზება, საბედნიეროდ, დროულად მოხერხდა“, – განმარტავენ ცაგერის მუნიციპალიტეტში.