ქობულეთის მუნიციპალიტეტის სოფელ ჯიხანჯურში, ცოფის შემთხვევების დადასტურების გამო, კარანტინი გამოცხადდა. მიზეზი ცოფით ინფიცირებული ტურის მიერ სამი ძროხის დაკბენაა, – ამის შესახებ „იმედინიუსს“ სურსათის ეროვნული სააგენტოს აჭარის რეგიონული სამმართველოს უფროსმა ინსპექტორმა ქობულეთში, ნატო ქარდავამ განუცხადა.
„სამ სხვადასხვა ოჯახში თითო სული ცხოველია დაკბენილი. საერთოდ, კარანტინი, ბოლო დაავადების დაფიქსირებიდან, 2 თვე გრძელდება. პირველი კარანტინი 22 დეკემბერს გამოცხადდა, როცა ცოფი პირველად დაფიქსირდა. მეორე შემთხვევა 27 დეკემბერს გამოვლინდა, შესაბამისად, საკარანტინო ვადის ხელახლა ათვლა დაიწყო. სამწუხაროდ, 11 იანვარს მესამე შემთხვევაც დაგვიფიქსირდა“ – განაცხადა ნატო ქარდავამ.
მისი განცხადებით, ბოლო შემთხვევის გამოვლენის თარიღიდან გამომდინარე, კარანტინი 11 მარტამდე გაგრძელდება.
“ამ სოფელში არ უნდა მოეწყოს ბაზრობები, ცხოველების ცოცხლად ყიდვა-გაყიდვა, ხორცისა და რძის პროდუქციის რეალიზება. პირველი შემთხვევის დაფიქსირებისთანავე, მივიღეთ ზომები, რომ გამოგვეცხადებინა იძულებითი ვაქცინაცია ამ სოფელსა და მის მიმდებარედ, 2-3 კილომეტრის რადიუსში. ამ რადიუსში კი, ნაწილობრივ მოექცა სამი სოფლის, ცეცხლაურის, სა და ქაქუთის ნაწილიც“ – განაცხადა ნატო ქარდავამ.
მისივე განცხადებით, ამ სოფლებში უკვე ჩატარდა როგორც მსხვილი რქოსანი პირუტყვის, ისე – ძაღლებისა და კატების იძულებითი ვაქცინაცია. ამასთან, დეზინფექცია ჩატარდა იმ სოფლებში, სადაც ცხოველი დაეცა.