„ნაციონალური მოძრაობის“ აქტივისტებმა, ქუთაისისმერთან შეხვედრის მოთხოვნით მერიის შენობაში შეჭრა სცადეს. მიუხედავად იმისა, რომ სამართალდამცველებმა არაერთხელ მოუწოდეს აქციის მონაწილეებს წესრიგის დაცვისკენ, ისინი პოლიციის მოთხოვნებს არ დაემორჩილნენ. მათ ასევე რამდენიმე წუთით ცენტრალური გზის სავალი ნაწილი გადაკეტეს, როდესაც რამდენიმე აქტივისტი გზაზე დაწვა და მანქანებს გადაადგილების საშუალებას არ აძლევდა. პოლიციის ჩარევის შედეგად საავტომობილო მოძრაობა აღდგა, აქციის 6 მონაწილე კი პოლიციამ დააკავა.
ქუთაისის მერის იოსებ ხახალეიშვილის განცხადებით, დესტრუქცია და არეულობა „ნაცმოძრაობის“ ხელწერაა და ხელისუფლება ამ არეულობის გაგრძელებას არ დაუშვებს.
„ეს არის ხელმოცარული, კრიმინალური ოპოზიციის მცდელობა, მოსახლეობა შეცდომაში შეიყვანოს და თავი დაჩაგრულ ოპოზიციად წარმოადგინოს. ისინი კვლავ შეეცადნენ საჯარო შენობების ბლოკირებას, როგორც ეს საარჩევნო კამპანიის დროს ხდებოდა. კანონის ფარგლებში არ მივცემთ მათ ამის საშუალებას და დავიცავთ ჩვენს თანამოქალაქეებს“, – განაცხადა იოსებ ხახალეიშვილმა.
„ნაცმოძრაობის“ აქტივისტების განცხადებით, თუ მათი დაკავებული თანამოაზრეები არ გათავისუფლდებიან, ისინი ქუჩაში გავლენ და ღამით გადაადგილებაზე დაწესებულ შეზღუდვას დემონსტრაციულად დაარღვევენ.