სამართალდამცავებმა გვიან ღამით, ზურაბ ჯაფარიძის ბარი დალუქეს. წინა დღეს დაჯარიმების მიუხედავად, „გირჩი – მეტი თავისუფლების“ ლიდერმა ბარი გუშინ საღამოს ისევ გახსნა.
შრომის ინსპექციის სამსახურმა ბარში „ჯაფარასთან” არანებადართული საქმიანობის განმეორებით განხორციელება დაადგინა და შემდგომი რეაგირებისთვის, მოპოვებული მტიკიცებულებები შინაგან საქმეთა სამინისტროს გადასცა.
კერძოდ, როგორც განმეორებითი შემოწმების შედეგად გახდა ცნობილი, ჯაფარიძე სანქციის მიუხედავად, წუხელ კვლავ ახორციელებდა აკრძალულ საქმიანობას. მოგვიანებით იქ სამართალდამცავები მივიდნენ, ყველა თანამშრომელი და სტუმარი გარეთ გაიყვანეს, ბარი დალუქეს, ორი პირი კი გამოკითხვაზე გადაიყვანეს.
თავად ჯაფარიძე ამბობს, რომ წესით, სამინისტრომ მის მიმართ სისხლის სამართლის საქმე უნდა აღძრას, თუმცა როგორც განმარტავს, მას აქვს დეპუტატის იმუნიტეტი, შესაბამისად, უწყებამ ჯერ უნდა მიმართონ პარლამენტს, რომ შეუჩერდეს უფლებამოსილება.