ლიეტუვაში დაინტერესდნენ, იყო თუ არა შეთანხმებული ჟიგიმანტას პავილიონისის ვიზიტი, საქართველოს მეგობრობა არ ნიშნავს, ცალმხრივად რომელიმე პოლიტიკურ პარტიას ეკეკლუცო, – ასე გამოეხმაურა იურიდიულ საკითხთა კომიტეტის თავმჯდომარე ანრი ოხანაშვილი ლიეტუვის საგარეო საქმეთა კომიტეტის თავმჯდომარის, ჟიგიმანტას პავილიონისის ლიეტუვის საკანონმდებლო ორგანოში განმარტებებისთვის დაბარებას.
„როგორც ჩანს, შესაბამისი ხელისუფლების წარმომადგენელი პირები დაინტერსედნენ იმით, თუ რა ვიზიტი განახორციელა ამ პირმა, იყო ეს თუ არა შეთანხმებული და საერთოდ, ის ინტერვენცია, რომელიც ამ ადამიანმა განახორციელა, იყო თუ არა მეგობრული, ეფუძნებოდა თუ არა ორივე მხარის მიმართ მოწოდებას. დაველოდოთ შეფასებებს. საქართველოს მეგობრობა ნიშნავს იმას, რომ ყველა მხარესთან მიმართებით იყო ნეიტრალური, ობიექტური და თანაბრად მოუწოდებდე შემხვედრი ნაბიჯების გადადგმისკენ. საქართველოს მეგობრობა არ ნიშნავს, ცალმხრივად რომელიმე პოლიტიკურ პარტიას ეკეკლუცო ან რომელიმე პოლიტიკური პარტიის მიმართ რაც უნდა პოლიტიკური სიმპატია გქონდეს, ამას საჯაროდ აფიქსირებდე. ალბათ ამასთან გვაქვს საქმე“, – განაცხადა ანრი ოხანაშვილმა.
„თქვენ უკვე დაკარგეთ ტერიტორიები, მომავლის დაკარგვაც გსურთ? თუ არ გაერთიანდებით, დიდი ფასის გადახდა მოგიწევთ“, – განაცხადა თბილისში ვიზიტისას ლიეტუვის სეიმის საგარეო საკითხთა კომიტეტის თავმჯდომარემ, ჟიგიმანტას პავილიონისმა. ამის შემდეგ ლიეტუვის სეიმის ვიცე-სპიკერებმა პავილიონისი განმარტებისთვის ლიეტუვის სეიმში დაიბარეს.