რადიკალიზმმა დაშალა ოპოზიცია, არა მარტო „ნაცმოძრაობა“, არამედ მასთან აფილირებული სხვა პოლიტიკური პარტიებიც, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ „იმედის კვირას“ განუცხადა, რომელმაც კომენტარი შარლ მიშელის დოკუმენტზე გააკეთა.
მისი თქმით, ახლა მთავარია, თუ როგორი პასუხისმგებლობით მიუდგებიან პარტიები აღნიშნულ დოკუმენტს.
„ამ დოკუმენტის მთავარი მიზანი ქართულ პოლიტიკაში ვითარების სრული დეესკალაცია, პოლარიზაციისა და რადიკალიზმის დასრულებაა. მიზნების მიღწევა პირველ რიგში დამოკიდებულია პოლიტიკურ პარტიებზე და იმაზე, თუ რამდენად პასუხისმგებლობით მოეკიდებიან ისინი დოკუმენტსა და მის სულისკვეთებას.
იმ რადიკალიზმმა, რომელსაც ამ თვეების განმავლობაში ვხედავდით, არაფერი მოუტანა ოპოზიციას. პირიქით, ამ რადიკალიზმმა დაშალა ოპოზიცია, არა მარტო „ნაცმოძრაობა“, არამედ მასთან აფილირებული სხვა პოლიტიკური პარტიებიც. რაც მეტად გააგრძელებენ რადიკალიზმს, მით უარესი მათი პარტიებისათვის, მაგრამ მთავარია, ქვეყანა განვითარების სხვა რელსებზე გადავიდეს, – განაცხადა კობახიძემ.