პოლიტიკური შეთანხმება შედგა, ხელოვნური კრიზისი დასრულდა. ეს აღიარეს ევროპელმა და ამერიკელმა პარტნიორებმა. ნებისმიერი სახის სპეკულაციები, მათ შორის ამნისტიის კანონპროექტთან დაკავშირებით დასრულებულია, – ამის შესახებ პარლამენტის საპროცედურო საკითხთა კომიტეტის თავმჯდომარის პირველმა მოადგილე გურამ მაჭარაშვილმა განაცხადა.
როგორც მაჭარაშვილმა საქართველოს პირველ არხთან საუბრისას განაცხადა, „ნაციონალური მოძრაობა” ტექნიკური ხასიათის მიზეზებს ეძებს, რათა შეთანხმება ნაკლებად შესრულდეს
„აქედან გამომდინარე, ხვალ ოპოზიციასთან ერთად ცვლილებები დავაინიციროთ. რაც შეეხება შინაარსს, ეს საკითხი შემოთავაზებული იყო ევროპელი კოლეგების მიერ და ითქვა, ხომ არ იქნებოდა კარგი, 20 ივნისი გადაგვეფურცლა და საქართველოში ახალი პოლიტიკური პროცესი დაგვეწყო. ჩვენ ეს წინადადება მივიღეთ და აღსრულება უნდა დაიწყოს. „ნაციონალური მოძრაობა” ტექნიკური ხასიათის მიზეზებს ეძებს, რომ ეს შეთანხმება ნაკლებად შესრულდეს. ეს არ გამოუვათ. ნიკა მელიას საკითხი დღის წესრიგიდან მოხსნილია. სულ მცირე პრიორიტეტული საკითხი არა მხოლოდ ქვეყნის შიგნით, არამედ საერთაშორისო პარტნიორების მხრიდანაც და ეს განცხადებებშიც იკითხება, იგივე ამერიკის ელჩისა და ევროპარლამენტარების, რომ ნიკა მელიას გადაწყვეტილება ვერ შეაფერხებს საქართველოს განვითარებას და დღის წესრიგში პრიორიტეტული საკითხების განხორციელებას. მას არაერთი შეთავაზება აქვს და ეს უნდა მიიღოს“, – განაცხადა გურამ მაჭარაშვილმა.