ნატომ ავღანეთიდან თავისი მისიის გაყვანა დაიწყო. ამის შესახებ ნატოს ოფიციალურმა პირმა საინფორმაციო სააგენტო „ფრანს-პრესს“ განუცხადა.
„ნატოს მოკავშირეებმა აპრილის შუა რიცხვებში გადაწყვიტეს, რომ 1-ელ მაისამდე „მტკიცე მხარდაჭერის მისიის“ ძალების გაყვანას დაიწყებდნენ და ძალების გაყვანა დაიწყო. ეს იქნება მოწესრიგებული, კოორდინირებული და მიზანმიმართული პროცესი“, – აღნიშნა ნატოს ოფიციალურმა პირმა.
ნატოში აღნიშნავენ, რომ გაყვანის პროცესში ჯარების უსაფრთხოება ყველაზე მთავარი პრიორიტეტი იქნება და ყველა საჭირო ზომას მიიღებენ სამხედრო პერსონალის უსაფრთხოების უზრუნველსაყოფად.
14 აპრილს აშშ-ის პრეზიდენტმა, ჯო ბაიდენმა ავღანეთიდან ამერიკული ჯარების გამოყვანა გამოაცხადა.
„დროა დასრულდეს ამერიკის ყველაზე ხანგრძლივი ომი. დროა ამერიკული ჯარები ავღანეთიდან დაბრუნდნენ“, – განაცხადა აშშ-ის პრეზიდენტმა.
ჯო ბაიდენმა აღნიშნა, რომ ავღანეთიდან ამერიკული ძალების გაყვანა 1-ელ მაისს დაიწყება.