“ქართული ოცნების” ერთ-ერთი ლიდერი და პარლამენტის ვიცე- სპიკერი, არჩილ თალაკვაძე მიიჩნევს, რომ მესამე პრეზიდენტი, მიხეილ სააკაშვილი ქართულ მართლმსაჯულებას ემალება და მიუხედავად არაერთი დაპირებისა, საქართველოში ვერ ჩამოდის, სწორედ ამიტომ, თალაკვაძის თქმით, მასთან ნიკა მელია ჩადის.
ამ განცხადებით, ვიცე-სპიკერი”ნაციონალური მოძრაობის” თავმჯდომარის ნიკა მელიას და პარტიის სხვა წევრების უკრაინაში გამგზავრებას გამოეხმაურა და თქვა, რომ “ნაციონალური მოძრაობა” შევა თუ არა პარლამენტში, ეს მათი პრობლემაა და არა ოპოზიციის. როგორც თალაკვაძე აღნიშნავს, ყველა პასუხისმგებლიანი პარტია პარლამენტში უკვე წარმოდგენილია.
“ვფიქრობ, რომ შარლ მიშელის შეთანხმების ხელმოწერის შემდეგ, პარლამენტისა და არჩევნების წინააღმდეგ საბოტაჟი და ხელოვნური კრიზისი დასრულებულია.
შესაბამისად, ამ ეტაპზე, ნიკა მელია და მიხეილ სააკაშვილი, მათი შეხვედრა და კომენტარები მეათე ხარისხოვანია, ნომერი პირველი საკითხი პანდემიის მართვა და ამით გამოწვეული ეკონომიკური ზიანის შემცირებაა.
ნიკა მელიას ჩასვლა სააკაშვილთან ემსახურება იმას, რომ სააკაშვილი ქართულ მართლმსაჯულებას ემალება და საქართველოში ვერ ჩამოდის, მიუხედავად არაერთი დაპირებისა. სწორედ ამიტომ, მელია ჩადის მასთან. სხვა შინაარსს ან რაიმე პერსპექტივას, რომ საქართველოს მომავალი ცხოვრებისთვის ეს შეხვედრა მნიშვნელოვანია, ვერ ვხედავ”, – განაცხადა არჩილ თალაკვაძემ.