პარლამენტში შესვლა „ნაცმოძრაობისთვის“ ძალიან მძიმე პროცესია, ვინაიდან ორი კვირის წინ ჩვენზე უმტკიცებდნენ ხალხს, რომ მოღალატეები ვართ, ახლა თავად უნდა მიიღონ იგივე გადაწყვეტილება და ახსნან, რატომ არ არიან მოღალატეები, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.
მისივე თქმით, სწორედ „ნაცმოძრაობის“ მხრიდან მოდიოდა უსამართლობის ნიაღვარი ოპოზიციის მისამართით.
„ცოტა რთულია პროგნოზირება, „ნაციონალურ მოძრაობაზე“ როცა საუბრობ, რას გააკეთებს და რა ლოგიკით იხელმძღვანელებს, მაგრამ ერთი რამ ნამდვილად შემიძლია ვთქვა, რომ ის უსამართლობის ნიაღვარი, რაც მომართეს თავის დროზე ჩვენი, შეთანხმებას ხელმომწერთა მისამართით, სწორედ ეს იქცა მთავარ დაბრკოლებად დღეს „ნაციონალური მოძრაობისთვის“. ხალხი, რომელიც ჩვენს წინააღმდეგ მოქოქეს, ახლა მოქოქილია იმ ლიდერების წინააღმდეგ „ნაციონალურ მოძრაობაში“, ვისაც უნდა შემოსვლა პარლამენტში. ახლა ეს პროცესი რთულია „ნაციონალური მოძრაობისთვის“, ძალიან მძიმე პროცესია, რადგან ორი კვირის წინ ჩვენზე უმტკიცებდნენ ხალხს, რომ მოღალატეები ვართ, ახლა თავად უნდა მიიღონ იგივე გადაწყვეტილება და ახსნან, რატომ არ არიან მოღალატეები, თუ იმავეს გააკეთებენ. ჩემი აზრით, მოღალატე არავინ არ არის და „ნაციონალური მოძრაობა“ უნდა შემოვიდეს პარლამენტში“, – განაცხადა მანჯგალაძემ.