ტყიბულის მაჟორიტარმა დეპუტატმა ბეჟან წაქაძემ პარლამენტში პლენარულ სხდომაზე განაცხადა, რომ მეშახტეებისა და მაღაროელებისთვის საპენსიო ასაკი უნდა დაიწიოს.
მისი თქმით, 65 წლის მეშახტის მკურნალობა სახელმწიფოს უფრო მეტი უჯდება, ვიდრე პენსია. დეპუტატმა მოუწოდა პარლამენტარებს, რომ მეშახტეებისა და მაღაროელებისთვის საპენსიო ასაკის დაწევის საკითხის განხილვებში ჩაერთონ.
„ტყიბული, ეს ქალაქი დააარსეს მეშახტეებმა და აქ, მეშახტეთა სულისკვეთებით, შახტიორების სულისკვეთებით ცხოვრობს თითოეული. და მე მინდა, რა თქმა უნდა, ყველა ამ მიმართულებით პრობლემები ასევეა ჭიათურაში, ასევეა ყველა შახტში და ასევე, მე ვფიქრობ, რომ გადასაწყვეტია საპენსიო ასაკის დაწევა. არ გვაძლევს ფორმატი იმის საშუალებას, რომ ამ ფორმატში გავშალოთ ეს თემა, მაგრამ გარწმუნებთ, რომ ამ პრობლემის გადაწყვეტა მოგვიწევს ხვალ და უმჯობესია ეს განვახორციელოთ დღეს. კოლეგებთან, ოპოზიციონერებთან ერთად, დავთვალოთ ყველაფერი და გადავწყვიტოთ“, – თქვა ბეჟან წაქაძემ.
წაქაძემ აღნიშნა, რომ ამ საკითხზე მას ექნება კომუნიკაცია ჯანდაცვის, ეკონომიკისა და ფინანსთა სამინისტროებთან.
„65 წლის მეშახტე, რომელიც ამოდის უკვე შახტიდან, ის უკვე „ინვალიდის“ სტატუსით ამოდის, მეგობრებო და ჩვენ, სახელმწიფოს გაცილებით მეტი გვიჯდება მისი განკურნება. ამიტომ, ამ თემაზე ვისაუბროთ და ამ თემაზე მე მექნება როგორც ჯანდაცვის სამინისტროს თან, ასევე, ეკონომიკის სამინისტროსთან და ასევე, ფინანსთა სამინისტროებთან ურთიერთობა და გთხოვთ კოლეგებს ყველანი ჩავერთოთ და გადავწყვიტოთ ეს თემა“, – თქვა მან.