ჭიათურის სოფელ შუქრუთის მცხოვრებლები, რომლებსაც პროტესტის ნიშნად, 25-ე დღეა პირი აქვთ ამოკერილი, მშრალ შიმშილობაზე გადავიდნენ. დღეიდან მათ წყლის დალევაზეც უარი თქვეს. აქციის მონაწილეებს ფეხზე დგომა უჭირთ და დღის განმავლობაში რამდენჯერმე სჭირდებათ სასწრაფო სამედიცინო დახმარება.
სოფელ შუქრუთის ქვეშ, მაღაროში, „ჯორჯიან მანგანეზის“ კონტრაქტორი კომპანია მანგანუმს უკონტროლოდ მოიპოვებს, რის გამოც სოფელში სახლები ინგრევა, ეზოებში კი თვალუწვდენელი ღრმულები გაჩნდა და იქ ცხოვრება საშიში ან შეუძლებელია. დაზარალებული მოსახლეობა სამართლიანი კომპენსაციის გადახდას ითხოვს ცხოვრების უსაფრთხო ადგილზე გასაგრძელებლად.
მეექვსე დღეა მოშიმშილეები თბილისში ჩამოვიდნენ და აქცია აშშ-ს საელჩოს მიმდებარე ტერიტორიაზე გააგრძელეს, სადაც მათ კარვის დადგმის უფლება არ მისცეს. შუქრუთელებს მანქანაში ან ღია ცის ქვეშ სძინავთ. ელჩმა კელი დეგნანმა თქვა, რომ იმედი აქვს, მათი წუხილი მოსმენილი და გაგონილი იქნება. ამ დრომდე მოშიმშილეებს არც ადგილობრივი და არც ცენტრალური ხელისუფლებიდან არავინ გამოხმაურებია.