ორივე ქვეყნის პრეზიდენტი უნდა გავუფრთხილდეთ საქართველოსა და უკრაინის ურთიერთობას, – ეს განცხადება საქართველოს პრეზიდენტმა სალომე ზურაბიშვილმა უკრაინაში ვიზიტისას ვოლოდიმირ ზელენსკისთან გამართულ ერთობლივ პრესკონფერენციაზე განაცხადა.
„ჩვენი ურთიერთობა ნორმალიზება და დაფუძნებულია ორ მთავარ პრინციპზე, ხალხთა შორის საუკუნოვან მეგობრობაზე, ერთმანეთის ტერიტორიული მთლიანობისა და სუვერენიტეტის მუდმივ და ურყევ მხარდაჭერაზე“, – განაცხადა სალომე ზურაბიშვილმა.
საქართველოს პრეზიდენტის განცხადებით, ორი ქვეყნის ურთიერთობაში მნიშვნელოვანია საუკუნოვანი მეგობრობის გარდა პარალელური ამოცანები და ერთობლივი მიზნები. „ესაა ჩვენი ქვეყნების ტერიტორიების დეოკუპაცია, ევროკავშირისა და ნატოსკენ მიმავალი გზა და ორმხრივი და რეგიონული თანამშრომლობის გაზრდა. დეოკუპაცია არის ჩვენი ქვეყნების ტკივილი, წუხილი და გამოწვევა. საქართველოს ამოცანაა დეოკუპაცია და ამ კუთხით ახალი სტრატეგიის ჩამოყალიბება. დებორდერიზაცია, ადამიანების უფლებების დაცვა და არ შემიძლია არ ვთქვა, რომ სტრასბურგის სასამართლოს დასკვნა არის საქართველოს გამარჯვება. ასევე ჩვენი მიზანია ოკუპირებულ ტერიტორიებზე მცხოვრებ მოქალაქეებთან ურთიერთობის აღდგენა“, – აღნიშნა ზურაბიშვილმა.
ამასთან საქართველოს პრეზიდენტის განცხადებით დეოკუპაციისკენ მიმავალი გზა არის მშვიდობიანი. „ამ მიმართულებით საქართველომ გააკეთა თავისი განაცხადი და უარი თქვა ნებისმიერი ძალის გამოყენებაზე“, – აღნიშნა ზურაბიშვილმა.