დღეს ძალიან პოზიტიური გამოხმაურება გვაქვს. ყველა მიესალმება ტრიოს ფორმატში ჩვენი ინტეგრაციული პროცესების შემდგომ გააქტიურებას. მიმღებლობა იყო ძალიან მაღალი და ვფიქრობ, ტრიოს ფორმატის პირველი პოზიტიური შედეგია, – ამის შესახებ საქართველოს ვიცე-პრემიერმა, საგარეო საქმეთა მინისტრმა, დავით ზალკალიანმა განაცხადა.
მისი თქმით, საბოლოო მიზანი ევროკავშირში გაწევრიანებაა.
„ყველა ერთხმად აღიარებს, რომ აუცილებელია შენარჩუნდეს პროცესში ინკლუზიურობა ანუ ყოვლისმომცველი იყოს პროცესი, მაგრამ აუცილებელია დიფერენცირებული მიდგომა. ეს ძალიან სამართლიანია, რადგან სამი ქვეყანა აჩვენებს პროგრესს და აუცილებელია ამ პროგრესს შემდგომი შემხვედრი ნაბიჯები მოჰყვეს ევროკავშირის მხრიდან. დღეს დაწყებული დიალოგი მომავალში კონკრეტულ შედეგებს მოიტანს. ჩვენი საბოლოო მიზანი ევროკავშირში გაწევრიანებაა. ეს ყველაფერი ემსახურება ამ პროცესის დაჩქარებას. ჩვენ 2024 წელს გავაკეთებთ განაცხადს მომავალი წევრობის თაობაზე. ეს ფორმატიც ერთგვარი დამხმარე საშუალება და ფორმაა პროცესების დაჩქარების. ჩვენ ვიმოქმედეთ სამთავრობო კომისიის გეგმის მიხედვით და ეს სრულ თავსებადობაშია საერთო ინტერესებთან,რაც ტრიოს ფორმატში გამოიკვეთა. აუცილებელია ვიყოთ პროაქტიულები. ეს ნიშნავს მეტი ინიციატივით გამოსვლას, მეტი შესაძლებლობები მოვნახოთ, რაც მოიპოვებს მოწონებას ევროპელი პარტნიორების მხრიდან. ეს ეხება ყველა მიმართულებას. ეკონომიკური განზომილება და ვაჭრობაც ერთ-ერთი მნიშვნელოვანი მიმართულებაა. თუ ჩვენ ასოცირების შეთანხმებას წარმატებით შევასრულებთ, მაშინ მათ უკვე ჩვენთვის სათქმელიც არაფერი ექნებათ, თუ რა შეიძლება იყოს ბარიერი“, – განაცხადა დავით ზალკალიანმა.