საქართველოს მთავრობა სრულად აკმაყოფილებს ტრეფიკინგის აღმოფხვრის მინიმალურ სტანდარტებს, – ნათქვამია აშშ-ის სახელმწიფო დეპარტამენტის მიერ ადამიანით ვაჭრობის (ტრეფიკინგის) შესახებ გამოქვეყნებულ ყოველწლიურ ანგარიშში.
ანგარიშში აღნიშნულია, რომ საქართველოს მთავრობამ სერიოზული და მდგრადი ძალისხმევა გასწია ტრეფიკინგთან ბრძოლის მიმართულებით იმის გათვალისწინებით, რომ პანდემიამ გავლენა მოახდინა ტრეფიკინგის წინააღმდეგ ბრძოლის შესაძლებლობებზე. ამიტომაც, საქართველო პირველ კალათაში დარჩა.
ანგარიშში დადებითადაა შეფასებული ადამიანით ვაჭრობის (ტრეფიკინგის) დანაშაულის გამოვლენის, ტრეფიკიორთა სისხლისსამართლებრივ პასუხისგებაში მიცემისა და მსხვერპლთა დახმარების მიზნით საქართველოს მთავრობის ძალისხმევის გაძლიერება.
„ეს ძალისხმევა მოიცავდა პანდემიის შედეგების შემსუბუქებას მთავრობის მიერ ორგანიზებულ თავშესაფრებში. მთავრობამ შეიმუშავა სახელმძღვანელო მითითებები ტრეფიკინგის მსხვერპლთა იდენტიფიკაციის მობილური დანაყოფებისთვის, რომლებიც ძალადობის მსხვერპლი ბავშვების იდენტიფიკაციას ახდენენ და 2021-2022 წლის ეროვნული სამოქმედო გეგმა მიიღო. მთავრობამ შრომის ინსპექციის სამსახური შექმნა, რომელიც იძულებითი შრომის სპეციალურ განყოფილებას მოიცავს და მუდმივმოქმედი ჯგუფის (არასამთავრობო ორგანიზაციებისა და საერთაშორისო ორგანიზაციების წარმომადგენელთა ხუთკაციანი საბჭო) მეშვეობით ოფიციალური მსხვერპლის სტატუსის მიღების პროცესი 2019 წელთან შედარებით გაუმჯობესდა“, – აღნიშნულია ანგარიშში.
სახელმწიფო დეპარტამენტში აცხადებენ, რომ მიუხედავად იმისა, რომ მთავრობა აკმაყოფილებს მინიმალურ სტანდარტებს, მან პასუხისგებაში ნაკლები ეჭვმიტანილი მისცა და ნაკლები მსხვერპლი გამოავლინა. გარდა ამისა, შრომის ინსპექტორებს კვლავ აკლიათ პერსონალი, რესურსები და ტრენინგი შრომითი ზედამხედველობის პასუხისმგებლობის შესასრულებლად.
ანგარიშში ასევე ნათქვამია, რომ ინფორმაცია რუსეთის მიერ ოკუპირებულ საქართველოს რეგიონებში აფხაზეთსა და სამხრეთ ოსეთში ადამიანით ვაჭრობის (ტრეფიკინგის) არსებობის შესახებ არ იყო ხელმისაწვდომი. ამასთან, მთავრობა და არასამთავრობო ორგანიზაციები მიიჩნევენ, რომ ოკუპირებული ტერიტორიებიდან იძულებით გადაადგილებული პირები ტრეფიკინგის კუთხით განსაკუთრებით მოწყვლადნი არიან.
ამერიკის შეერთებული შტატების სახელმწიფო დეპარტამენტი ადამიანით ვაჭრობის (ტრეფიკინგის) მონიტორინგისა და პრევენციის ოფისის მეშვეობით მსოფლიოს მასშტაბით ყოველწლიურად აფასებს 190-მდე სახელმწიფოს მიერ განხორციელებულ ღონისძიებებს ადამიანით ვაჭრობის (ტრეფიკინგის) წინააღმდეგ ბრძოლის მხრივ. აშშ-ის სახელმწიფო დეპარტამენტის შეფასება ისეთ ძირითად კომპონენტებს ეფუძნება, როგორიცაა: სახელმწიფოს მიერ ადამიანით ვაჭრობის (ტრეფიკინგის) პრევენცია, ტრეფიკინგის მსხვერპლთა დაცვა, დამნაშავეთა სისხლისსამართლებრივი დევნა და ტრეფიკინგის კუთხით პარტნიორობა მთავრობებსა და სამოქალაქო საზოგადოებას შორის.