ჯეიმს აპატურაი დღეს პრემიერ-მინისტრს, პრეზიდენტს, პარლამენტის თავმჯდომარესა და მინისტრთა კაბინეტის წევრებს შეხვდება. ეს ნატოს გენერალური მდივნის სპეციალური წარმომადგენლის რანგში მისი ბოლო ვიზიტია.
აპატურაის განცხადებით, მისი ეს ვიზიტი ხელს შეუწყობს ქვეყანაში მიმდინარე რეფორმებს, ასევე ნატოსთან საქართველოს დაახლოებას.
„აპატურაი ნატოს საკმაოდ მაღალი დონის წარმომადგენელია და განსაკუთრებული ემოციური დამოკიდებულება აქვს ჩვენს ქვეყანას. რეალურად მისი ჩამოსვლა გამოხატავს იმ ამოცანას, რაც ნატოს აქვს – ახლოს ჰყავდეს მოკავშირე ამ მეტად რთულ ვითარებაში“, – აცხადებს პარლამენტის პირველი ვიცე-სპიკერი გიორგი ვოლსკი.
საპარლამენტო უმრავლესობის წევრის, გურამ მაჭარაშვილის განცხადებით, ყველა ასეთი ვიზიტი ადასტურებს იმას, რომ საქართველო მზად არის ნატოს წევრობისთვის.
„რა თქმა უნდა, ეს დამოკიდებულია პოლიტიკურ გადაწყვეტილებაზე, ამიტომ ჩვენ დიდი სიამოვნებით შევხვდებით ჯეიმს აპატურაის“, – ამბობს მაჭარაშვილი.