ჩვენ ვგმობთ ყველანაირ ძალადობას. ჩვენ ყველა ვემიჯნებით, ამაზე ორ აზრი არ არსებობს, – ეს განცხადება ახალციხის, ტაო-კლარჯეთისა და ლაზეთის ეპარქიის მმართველმა, მეუფე თეოდორემ ზუგდიდში გააკეთა, რომელიც სხვადასხვა ეპარქიის მეუფეებთან ერთად ვლაქერნობის დღესასწაულს ესწრება.
მეუფემ 5 ივლისს განვითარებული მოვლენები კიდევ ერთხელ შეაფასა და განაცხადა, რომ იმ დღეს ძალადობაზე სასულიერო პირებისგან მოწოდება არ ყოფილა.
„მამებისგან ძალადობაზე მოწოდება არ ყოფილა. იყო ერთეული, რამდენიმე შემთხვევა, როდესაც არასწორად თქვა, შემდეგ შეასწორა და ბოდიში მოიხადა საჯაროდ. მამაოები იქ ყველაფერს აკეთებდნენ, რომ ძალადობა არ მომხდარიყო და ეფარებოდნენ. სამწუხაროდ ცუდად აშუქებთ თქვენ, მამები ამას არ აკეთებდნენ. ჩვენ ვიყავით მშვიდობიან პარაკლისზე, მშვიდობიანი პროტესტით. მამაო გადაეფარა, უბრალოდ თქვენ ვერ ნახეთ ეტყობა კადრები კარგად, ნახეთ, რომ მამებსაც მოხვდათ?! პირველ რიგში, მე ვფიქრობ, რომ პასუხისმგებლობა თუკი ვინმემ უნდა აიღოს, ესენი არიან პრაიდის ორგანიზატორები და მათი მხარდამჭერები, რადგან მათ არ შეცვალეს თავისი განცხადება, თავისი გამოსვლა მიუხედავად მრავალი მოწოდებისა. შეცვალეს უკვე ბოლოს, როდესაც ხალხი გადარეული იყო.
ჩვენ ვგმობთ ყველანაირ ძალადობას. ჩვენ ყველა ვემიჯნებით, ამაზე ორ აზრი არ არსებობს, მაგრამ ხომ უნდა ვნახოთ, საიდან წამოვიდა, რამ გამოიწვია. ეს გამოიწვია იმ ძალადობამ, რასაც პრაიდის წარმომადგენლები ახორციელებდნენ ქართველ ერზე. სამწუხაროდ ხელისუფლებამ ვერ შეძლო და არ იყო მზად. მე როგორც მოვისმინე, ხელისუფლება ამბობს რომ ჩვენ არ ველოდით, რომ ჟურნალისტებზე დაიწყებოდა ასეთი ძალადობა, თუ რაც ჰქვია ამას. ლექსოზე პასუხი უნდა აგოს მთელმა საზოგადოებამ. თქვენ გგონიათ, თქვენ თავისუფალი ხარ? არ ხართ თქვენ თავისუფალი, არც ჩვენ ვართ თავისუფალი და პირველ რიგში, დამნაშავეები არიან პრაიდის ორგანიზატორები და მათი მხარდამჭერები“, – განაცხადა მიტროპოლიტმა თეოდორემ.