ლელა ტალიური – არასამთავრობო ორგანიზაციების 4 ნოემბრის გავრცელებული განცხადება ნაჩქარევი იყო

ცესკო-ს წევრობის კანდიდატი ლელა ტალიური მიიჩნევს, რომ არასამთავრობო ორგანიზაციების მიერ 2020 წლის 4 ნოემბერს გავრცელებული განცხადება ნაჩქარევი იყო და სწორედ ამიტომ არ იყო ამ განცხადებაზე მისი ორგანიზაციის ხელმოწერა. – ამის შესახებ არასამთავრობო ორგანიზაცია „მრავალეროვანი საქართველოს“ წარმომადგენელმა ლელა ტალიურმა პარლამენტის იურიდიული კომიტეტის სხდომაზე, დეპუტატების მიერ დასმული შეკითხვის პასუხად განაცხადა.
მისი თქმით, როდესაც განცხადება მომზადდა, ფაქტიურად არჩევნები მიმდინარეობდა, ჯერ პროცესები არ იყო დასრულებული, არ იყო დათვლილი ხმები, მასალა იგზავნებოდა ოლქებში.
„რაც შეეხება, 4 ნოემბრის არასამთავრობო ორგანიზაციების მიერ გავრცელებულ განცხადებას, თუ რატომ არ არის იქ ჩვენი ხელმოწერა, ვფიქრობ იყო ძალიან ნაჩქარევი. როგორც მახსოვს, მომზადდა არჩევნების დღეს, შეიძლება ღამეც, ზუსტად არ მახსოვს, ფაქტიურად არჩევნები მიმდინარეობდა. ჯერ პროცესები არ იყო დასრულებული, დათვლილი არ იყო ხმები, მასალები მიდიოდა ოლქებში. შესაბამისად, ჩვენ წინ გვქონდა თერთმეტი დღე ოლქის შემთხვევაში, რომ მათ ეს შედეგები დაეჯამებინათ. ფრაზა, რომელმაც მე ფაქტობრივად მიმაღებინა გადაწყვეტილება იყო ის, რომ ხელისუფლებამ არჩევნები დემოკრატიული სტანდარტების შესაბამისად ვერ ჩაატარა. ეს იყო იგივე, რომ არჩევნები არ ჩატარდა დემოკრატიული სტანდარტების შესაბამისად. როცა არ დასრულებულა პროცესი, მიმდინარეობს და გვაქვს პრეტენზია რომ ვართ პროფესიონალი არასამთავრობო ორგანიზაციები, რომელიც პროფესიული კუთხით ვაფასებთ არჩევნებს, მე ჩავთვალე, რომ ამ ტიპის განცხადება, რომელიც ამ ფრაზას მოიცავდა, ძალიან ნაადრევი იყო. აქედან გამომდინარე, საბოლოო ჯამში დისკუსიის შედეგად მივიღეთ ასეთი გადაწყვეტილება. თუმცა, ვიმეორებ, იყო იქ საკითხები, რომელსაც მე პირადად ვიზიარებდი“ – განაცხადა ლელა ტალიურმა.