საქართველოს შინაგან საქმეთა მინისტრის ვახტანგ გომელაურის განცხადებით, ოპერატორ ლექსო ლაშქარავას პროზექტურაში გადასვენების კადრები ნახა და როგორც აცხადებს, ძალიან მძიმე სანახავი იყო.
როგორც გომელაურმა „ღამის კურიერის“ ეთერში განაცხადა, მისთვის ასევე ძალიან მძიმე იყო ლექსო ლაშქარავასთან დაკავშირებით ბრიფინგებზე კადრების გავრცელება. შინაგან საქმეთა მინისტრი აცხადებს, რომ მაღალი ინტერესიდან გამომდინარე, იძულებული გახდნენ, ხალხისთვის გამოძიების საწყის ეტაპზე მოპოვებული ინფორმაცია მიეწოდებინათ.
„კი, ძალიან მძიმე სანახავი იყო. ასევე ძალიან მძიმე სანახავი იყო მისი დაკრძალვის კადრებიც, პირდაპირ გეტყვით ჩემთვის ძალიან მძიმე იყო თუნდაც იმ კადრების გაშვება, რისი გავრცელებაც ბრიფინგებზე მოგვიწია. მერწმუნეთ, იძულებული გავხდით, არანაირი სურვილი არ გვქონდა არც მე, არც ჩემს თანამშრომლებს, ჩემს მოადგილეებს, ხელმძღვანელ პირებს, რომ ეს გაგვეშვა და ენახათ მის ოჯახის წევრებს, დედას, შვილს.
ჩემთვის ძალიან მძიმე იყო და ძალიან ვწუხვარ, რომ ამ კადრების გაშვება მოგვიწია, მაგრამ საზოგადოებაშიც წამოიწია საკითხმა, რომ გაგვეჟღერებინა ინფორმაცია, თუ რა მოხდა, ძალიან აიწია ტემპერატურამ და უკვე იძულებული გავხდით, გაგვეცა პასუხი, თუ რა მოუვიდა ამ ადამიანს, რა მოხდა. მთელი გუნდი ჩართული იყო და სწრაფად რაც ვიმუშავეთ, იძულებული გავხდით, ამის შესახებ ინფორმაცია მიგვეწოდებინა ხალხისთვის“, – განაცხადა ვახტანგ გომელაურმა.