აჭარაში საკმაოდ მძიმე მდგომარეობა გვაქვს, თუმცა მნიშვნელოვანია, რომ ძალიან კარგად იმართება პაციენტებზე ზრუნვა და საწოლფონდის მობილიზება მაქსიმალურია, – ამის შესახებ ჯანდაცვის მინისტრმა, ეკატერინე ტიკარაძემ ბათუმში გამართულ ბრიფინგზე განაცხადა.
მისივე თქმით, ის და მისი მოადგილე შეხვედრებს გამართავენ კლინიკურ ჯგუფებთან და სასტუმრო სექტორთან.
„ამოცანა და მიზანი არის, მოხდეს პაციენტების დროული გაწერა კლინიკებიდან და მათი გადაყვანა სასტუმროებში, სადაც განთავსებულები არიან ექიმები და დღესდღეობით აჭარას სასტუმროებისთვის მობილიზებული ჰყავს 200-მდე ექიმი და 300-მდე ექთანი“,- განაცხადა ეკატერინე ტიკარაძემ.
მისივე თქმით, დღეის მდგომარეობით, საქართველოში 48 000-მდე აქტიური შემთხვევაა.
„აქედან 38 000-მდე შემთხვევა იმართება ბინაზე ოჯახის ექიმების მხრიდან. ასევე მობილიზებულია 8000-მდე საწოლი. ამ ეტაპისთვის სრულიად საქართველოს მასშტაბით თავისუფალია 500-მდე საწოლი. ეს რიცხვი მუდმივად ცვალებადია“, – განაცხადა ეკატერინე ტიკარაძემ.