900 წელი გავიდა მას შემდეგ, რაც ქართველებმა მტერზე ნამდვილად სამაგალითო გამარჯვება მოვიპოვეთ. დავით აღმაშენებელმა დიდგორის ბრძოლაში გამარჯვებით დაგვიტოვა მაგალითი, რომლითაც ნებისმიერი ერი და ქვეყანა იამაყებდა, – ამის შესახებ საქართველოს პარლამენტის თავმჯდომარემ, კახა კუჭავამ დიდგორობისადმი მიძღვნილ ღონისძიებაზე სიტყვით გამოსვლისას განაცხადა.
მისი თქმით, სახელმწიფოებრივი და ეროვნული აზროვნების ყველაფერზე მაღლა დაყენებით ჩვენ შევძლებთ მომავალშიც ასეთი დიდი გამარჯვებების მოპოვებას.
„მჯერა, რომ სახელმწიფოებრივი და ეროვნული აზროვნების ყველაფერზე მაღლა დაყენებით, ჩვენ შევძლებთ მომავალშიც ასეთი დიდი გამარჯვებების მოპოვებას. მჯერა, რომ ერის ერთობით და მაშინ, როდესაც სიმართლე ჩვენ მხარეს არის, ჩვენ ყოველთვის გავიმარჯვებთ მიუხედავად იმისა, მიუხედავად იმისა, რამდენად ძლევამოსილი მრავალრიცხოვანი იქნება მტერი თუ ძალა, რომელიც ჩვენ გვებრძვის. ამ ბრძოლის ველზე ჩვენმა წინაპრებმა დაღვარეს სისხლი, შესწირეს სიცოცხლე იმ ოცნებას, რომლისთვისაც ჩვენ დღესაც ვაგრძელებთ ბრძოლას, რომ საქართველო იყოს ერთიანი, ძლიერი, გაერთიანებული. ჩვენ ნამდვილად გვაქვს შექმნილი ის საფუძველი, რომელზეც უნდა დავაშენოთ 21-ე საუკუნის, ევროპული სახელმწიფოს მშენებლობა. ავასრულოთ ის ოცნება, რომელიც ვენი წინაპრების სანუკვარი ოცნება იყო, საქართველო ვიხილოთ გაერთიანებული, ძლიერი და ნათელი მომავლით, ვულოცავ მთელ საქართველოს დიდგორის ბრძოლაში გამარჯვების 900 წლის იუბილეს“, – განაცხადა კახა კუჭავამ.