პრემიერ-მინისტრმა ირაკლი ღარიბაშვილმა განაცხადა, რომ მომავალში COVID-19-ის საწინააღმდეგო ვაქცინაცია საქართველოში სავალდებულო სახეს მიიღებს. ამასთან, პრემიერი მოქალაქეებს მოუწოდებს დღესვე აიცრან კორონავირუსის საწინააღმდეგო ვაქცინით, წინააღმდეგ შემთხვევაში ვირუსით გარდაცვალების შემთხვევები კიდევ გაიზრდება.
“ამერიკის შეერთებული შტატები არის ყველაზე ძლიერი ქვეყანა და სექტემბერში უკვე საბოლოოდ დაამტკიცებს Pfizer-ის ვაქცინას, ანუ ზოგადად გამოაცხადებს, რომ ყველა დონის ავტორიზაცია გაიარა ვაქცინამ. რაც ნიშნავს იმას, რომ ამერიკა საკუთარი მოქალაქეებისთვის სავალდებულოს გახდის ვაქცინების მიღებას. შესაბამისად, ჩვენ გვინდა თუ არ გვინდა, ამის გაკეთება მოგვიწევს.
ვინც აცრას არ ჩაიტარებს, სამწუხაროდ, უნდა ვთქვათ, ვუყურებთ ამ რეალობას, რომ გარდაცვალება მოგვემატება. თავის დაზღვევის მიზნით საჭიროა ძალიან მარტივი აცრის ჩატარება. საჭირო რაოდენობის ვაქცინები გვაქვს და უნდა დავარწმუნოთ ჩვენი მშობლები, შვილები, ახლობლები, მეგობრები რომ ავიცრათ. მე და ჩემი ოჯახის წევრები აცრილები ვართ. მთავარი არგუმენტი არის ის, რომ აცრა გვიცავს სიკვდილისგან. ბევრი ჩემი ახლობელი კოვიდის გამო გარდაიცვალა, ისინი ამას ვერ წარმოიდგენენ. ამიტომ უნდა ავიცრათ და დავიცვათ ჩვენი თავი, ოჯახის წევრები, ახლობლები და ჩვენი ქვეყანა“, – მოუწოდა მოქალაქეებს ირაკლი ღარიბაშვილმა.