“ბოლო რამდენიმე დღეა, აფხაზეთში აქტიურად განიხილავენ ე.წ. უკრაინული ვიკილიქსის მიერ სოციალურ ქსელებში გავრცელებულ საფოსტო მიმოწერებს, რომელიც ჯერ კიდევ 2014 წელს აფხაზეთთან და სამხრეთ ოსეთთან დაკავშირებულ საკითხებში რუსეთის პრეზიდენტის, ვლადიმერ პუტინის თანაშემწე ვლადისლავ სურკოვისა და აფხაზეთის 2014 წლის ე.წ. საპრეზიდენტო კანდიდატების, რაულ ხაჯიმბას, ლეონიდ ძიაპშბას და მერაბ ქიშმარიას შორის მიმდინარეობდა. უკრაინელი ჰაკერების საიტზე “კიბერხუნტა”, განთავსებულია უამრავი დოკუმენტი, რომელიც 2013-2014 წლით თარიღდება და უშუალოდ რუსულ-აფხაზურ ურთიერთობას ეხება”, – წერს გაზეთი “რეზონანსი” სტატიაში სათაურით სკანდალი აფხაზეთში, რომელიც, შესაძლოა, საყოველთაო მღელვარებაში გადაიზარდოს / უკრაინელმა ჰაკერებმა სეპარატისტთა ხელმძღვანელობისა და რუსეთის პრეზიდენტის მრჩევლის მიმოწერა გამოაქვეყნეს.
“აფხაზი მოქალაქეების და აფხაზი პოლიტიკოსების განსაკუთრებით მწვავე რექცია 2014 წლის “საპრეზიდენტო არჩევნებში” მონაწილე სამი კანდიდატის “საზოგადოებრივ შეთანხმებაზე” მოსკოვის რეაქციამ გამოიწვია. აღნიშნულ დოკუმენტებში რუსული მხარე “პრეზიდენტობის” კანდიდატების მიერ ხელმოწერილი შეთანხმების ორი პუნქტით განსაკუთრებით უკმაყოფილოა. პირველი ეხება შეთანხმებას, რომ პრეზიდენტად არჩევის შემთხვევაში ისინი ხელს არ მოაწერენ “აფხაზეთის სუვერენიტეტის შემლახველ” საერთაშორისო შეთანხმებებს; მეორე პუნქტი კი – უვადო მორატორიუმის გამოცხადებას იმ “კანონის” მიღებაზე, რომელიც უცხოელებს აფხაზეთში უძრავი ქონების შეძენის უფლებას აძლევს. ამ უკმაყოფილების ადრესატი რაულ ხაჯიმბაა, რომელიც საპასუხო წერილში წერს, რომ “საზოგადოებრივ შეთანხმებას” ხელი მხოლოდ “ელექტორალური მოსაზრებების” გამო მოაწერა და რომ ეს შეთანხმება არ წარმოადგენს დამაბრკოლებელ გარემოებას მის მიერ საკუთარ თავზე აღებული იმ ვალდებულებების შესასრულებლად, რომელიც მანამდე შეათანხმა მოსკოვთან”, – აღნიშნავს გამოცემა.
“უკრაინელმა ჰაკერებმა რაულ ხაჯიმბასა და ვლადისლავ სურკოვის დიალოგიც გაასაჯაროვეს, რომელიც აფხაზური “არმიის” რუსეთის შეიარაღებულ ძალებთან შერწყმასა და “სამხედრო თანამშრომლობას” ეხება. მიმოწერაში სურკოვი და ხაჯიმბა აფხაზეთის ტერიტორიაზე ერთობლივი საპოლიციო საკოორდინაციო ცენტრის გახსნას და საზღვაო და სახმელეთო პუნქტების ერთობლივ კონტროლზე საუბრობენ. საუბარი ასევე ეხება აფხაზეთში რუსული საპენსიო სისტემის ამოქმედებას და სოციალური დახმარებების გაცემას. პოლიტიკური პარტია “აინარის” ხელმძღვანელი თენგიზ ჯოპუა საკუთარ გვერდზე გამოეხმაურა სოციალურ ქსელში გავრცელებულ მიმოწერას და მას “სურკოვისა და მოღალატე ხელისუფლების ეპისტოლარული შემოქმედება უწოდა”, – განაგრძობს გამოცემა.
“ჩვენი ქვეყნის პრეზიდენტი და მთელი მისი გარემოცვა ატყუებდნენ საკუთარ ხალხს, რათა ნებისმიერი მეთოდით ხელში ჩაეგდოთ ძალაუფლება. ეს არის საკუთარი ხალხის მტერი ხელისუფლება და იგი არ წარმოადგენს აფხაზი ხალხის ხელისუფლებას. აფხაზეთის კონსტიტუციიდან არაფერი დარჩა, ყველაფერი ფულის სანაცვლოდ რუსეთის ფედერალურ ბიუჯეტს გადაეცა”, – წერს ჯოპუა. აფხაზი პოლიტიკოსი ალხას თხაგუშევი კი მოუწოდებს ხელისუფლებას, გამოფხიზლდეს, წინააღმდეგ შემთხვევაში, მათ სურკოვთან გაქცევა მოუწევთ:
“აფხაზური ვიკილიქსი არის ბომბი! რეალური მასალა და ჩვენი ხელისუფლების ტესტი ერთგულებაზე – თუ ისინი ამ ყველაფრის მერე ისევ გააგრძელებენ სურკოვთან საქმის წარმოებას, ე.ი. რაც გავრცელდა, სიმართლე იქნება. გამოფხიზლდით, ემსახურეთ საკუთარ ერს, წინააღმდეგ შემთხვევაში სურკოვთან გაქცევა მოგიწევთ”. სოციალური ქსელების მომხმარებლები წერენ, რომ ეს არის “სუვერენული სახელმწიფოს” შიდა საქმეებში რუსული მხრის მიერ უხეში ჩარევა და მათთვის საინტერესო იქნებოდა “პრეზიდენტის” კომენტარი”. ე.წ. აფხაზეთის პრეზიდენტის ადმინისტრაცია ამ ფაქტს ჯერ არ გამოხმაურებია”, – დასძენს გამოცემა.
“რუსეთი დიდი ხანია ცდილობს აფხაზეთის საბოლოოდ შემოერთების საკითხის დაჩქარებას. როგორც ცნობილია, რუსეთმა ჯერ კიდევ სერგეი ბაღაფშის “პრეზიდენტობის” დროს მოითხოვა, რომ რუსეთის ფედერაციის მოქალაქეებს აფხაზეთში უძრავი ქონების შეძენისა და იურიდიულად გაფორმების უფლება მიეღოთ, თუმცა უშედეგოდ. ცალკე აღსანიშნავია აფხაზეთში 2014 წელს მომხდარი გადატრიალება, რომლის შედეგადაც “პროაფხაზად” მიჩნეული პოლიტიკოსი ალექსანდრე ანქვაბი, “პრორუსმა” რაულ ხაჯიმბამ შეცვალა. რაულ ხაჯიმბას “არჩევისთანავე” ოკუპირებული აფხაზეთის ე.წ. პარლამენტმა განიხილა კანონპროექტი, რომელიც აფხაზეთში მიწების უცხოელებზე გასხვისებას ითვალისწინებს. ამ კანონპროექტს წინ უძღოდა რაულ ხაჯიმბას კიდევ ერთი ინიციატივა, რუსეთისა და აფხაზეთის თავდაცვის სამინისტროების გაერთიანების შესახებ”, – წერს სტატიის ავტორი.
“2014 წლის 25 სექტემბერს, რაულ ხაჯიმბას ინაუგურაციაზე, ვლადისლავ სურკოვმა გააკეთა განცხადება, რუსეთსა და აფხაზეთს შორის ე.წ. ინტეგრაციის ხელშეკრულების მოსალოდნელი გაფორმების შესახებ. 14 ოქტომბერს რუსეთსა და აფხაზეთს შორის მოკავშირეობისა და ინტეგრაციის შესახებ “ხელშეკრულების” პროექტი გამოქვეყნდა და მისი განხილვა დაიწყო. 24 ნოემბერს სოჭში ოკუპირებულ აფხაზეთსა და რუსეთის ფედერაციას შორის “მოკავშირეობისა და სტრატეგიული პარტნიორობის შესახებ” “ხელშეკრულება” გაფორმდა. 2014 წლიდან რუსი სამხედროების მიერ აფხაზეთში ბინების შეძენის მაჩვენებელი სამჯერ გაიზარდა. კავკასიის საკითხებში ექსპერტისა და პოლიტოლოგის, მამუკა არეშიძის განმარტებით, ეს არის მიმდინარე ქრონიკა, რის შესახებაც აფხაზებმა აქამდეც კარგად იცოდნენ”. “აფხაზთა კრების” ლიდერი მალხაზ პატარაია კი აცხადებს, რომ ამ მასალებში არაფერია ისეთი, რაც აქამდე არ ვიცოდით, – დასძენს სტატიის ავტორი.
“რაც ხდება დღეს, ჩვენთვის დიდი ხანია ნათელია. მოაზროვნე აფხაზებმა კარგად იცოდნენ ამ ყველაფრის შესახებ. უბრალოდ, ამ გამოქვეყნებულმა მასალებმა ნახევრად ოფიციალური სახე მისცა რუსულ-აფხაზურ ურთიერთობას. აფხაზებმა დაინახეს, თუ როგორი ცინიკური დამოკიდებულება აქვს რუსეთს მათ მიმართ. ასეთივე ცინიკურია რუსეთის მცდელობა, გადაიბიროს ყველა აფხაზი პოლიტიკოსი და საზოგადოებრივად აქტიური ადამიანი. ამ ფაქტის შეფასება ძალიან მძიმეა, რადგან დარწმუნებული ვარ, მაინც არაფერი შეიცვლება. აფხაზებმა თავად ჩაიგდეს თავი ამ დღეში. რუსეთისთვის მთავარი აფხაზური ელიტის ხელში ჩაგდება იყო და ნაწილობრივ მიაღწია კიდეც. აფხაზები ინერტული ხალხია, ასე სჩვევიათ, ცოტა ხანი ინერვიულებენ და ბოლოს მაინც ამ გზით გააგრძელებენ სვლას”, – აცხადებს გამოცემის კორესპონდენტთან საუბრისას მამუკა არეშიძე.
“ის ფაქტები, რაზეც ამ მიმოწერაშია საუბარი, უკვე ლეგალურად არის მომხდარი, რატიფიცირებულია რუსეთთან სამხედრო თანამშრომლობაც. რაც შეეხება აფხაზეთის ტერიტორიაზე უცხოელების დასახლებას, ამის მსურველი ბევრი არავინაა, ვინაიდან იქ არის ეკონომიკური სიდუხჭირე, კლანური მმართველობა, განუკითხაობა, ცხოვრების დონე იმდენად დაბალია, რომ თვითონ აფხაზების უმეტესი ნაწილი რუსეთშია გადახვეწილი. ვინც ადგილზეა დარჩენილი, ყველა რუსული ბიუჯეტიდან იკვებება. პოზიციაც და ოპოზიციაც რუსეთის მიერაა დანიშნული. “დანიშნულები” არიან არასამთავრობოებიც, დეპუტატებიც, მწერლებიც… ისინი ყველანი მზად არიან ემსახურონ რუსეთის სპეცსამსახურებს, რომლებიც ჩანასახშივე ჩააქრობენ ყველა შესაძლო დაპირისპირებას და საპირისპირო აზრს”, – განმარტავს გამოცემასთან საუბრისას მალხაზ პატარაია.
“აფხაზური ვითომ ოპოზიციის გააქტიურებაც რუსეთის დაკვეთაა. ისინი გვიქმნიან ილუზიას, რომ აფხაზეთი არის სახელმწიფო და იქ განსხვავებული აზრიც არსებობს. იქ ყველაფერი გარკვეულია, ეს ყველაფერი ჭიქაში ქარიშხალს მაგონებს. საქართველოსთვის ხიფათი ივანიშვილის ერთპიროვნული მმართველობაა, ჩვენმა სახელმწიფო პოლიტიკამ და რუსეთის მიმართ ლოიალურმა განწყობამ შეიძლება ძალიან მძიმე მდგომარეობაში ჩაგვაყენოს. “ქართული ოცნების” მიერ გაჟღერებული აფხაზეთის რკინიგზის გახსნის საკითხი აფხაზეთის მარიონეტული რეჟიმის აღიარებას ნიშნავს”, – დაასკვნის “აფხაზთა კრების” ლიდერი.