დღეს, გამთენიისას ჭიათურის სოფელ მანდაეთში ტრაგედია დატრიალდა: ერთ-ერთ ხის სახლში, სადაც მოხუცი ცოლ-ქმარი ცხოვრობდა, ხანძარი გაჩნდა და ორივე ემსხვერპლა.
სოფელ მანდაეთის მკვიდრი “პრაიმტაიმთან” 101 წლის მარო და ნოე მუმლაძეებზე ამბობს:
“თურმე, როდესაც ნოე იბადებოდა, დედამისი სახლში მშობიარობდა და ბებიაქალი ეხმარებოდა. სწორედ იმ დროს, როცა ბავშვი დაიბადა, მეზობელმა ბებიაქალს მეორე მშობიარესთან დაუძახა. იქ გოგო დაიბადა და ბებია ქალს მეორე დღეს უთქვამს, ესენი ერთმანეთის ბედი იქნებიანო…
ბავშვები ერთად იზრდებოდნენ, რაც თავი ახსოვდათ, იმ დროიდან ახსოვდათ ერთმანეთიც. სკოლაშიც ერთად დადიოდნენ.
ნოეს ადრიდანვე ჩავარდნია გულში ლამაზი მარო, მაგრამ გოგოს გული გვიან მოიგო. მარომ 27 წლისამ გადაწყვიტა ნოეზე გათხოვება.
5 შვილი და უამრავი შვილთაშვილი ჰყავს ერთ დღეს დაბადებულ წყვილს, ცხოვრებას სიამტკბილობით მიუყვებოდნენ. ეზოში 2 სახლი იდგა, ერთი შვილებმა ააშენეს, კაპიტალური სახლი, მაგრამ მოხუცები მაინც ხის სახლში ცხოვრობდნენ.
გამთენიისას სოფელი შეძრა ამბავმა, რომ მუმლაძეების სახლში ხანძარი იყო. ხალხი მისახმარებლად გამოვიდა, მაგრამ უკვე გვიანი იყო, სახლი დანაცრებული დაგვხვდა. სახანძროც მოვიდა, სასწრაფოც, მაგრამ მოხუცებს უკვე არაფერი ეშველებოდათ.
ექსპერტებიც მოვიდნენ. მოხუცებიდან ერთ-ერთი (გარჩევა შეუძლებელია, რომელი იყო), ოთახის შუაგულში იყო იატაკზე წაქცეული და ხელში წყლის ჭურჭელი ეჭირა. როგორც ჩანს, გაეღვიძა, ხანძრის ჩაქრობა სურდა და წყალზე მიდიოდა.
წვიმიანი ამინდი იყო, შესაძლოა, მოხუცებს შესცივდათ კიდეც და ღუმელი დაანთეს, ნაკვერჩხალი გადმოვარდა და ხანძარი გაჩნდა, მაგრამ ექსპერტებმა თქვეს, ღუმელს არ ეტყობა, ახალი დანთებული რომ იყო ცეცხლიო. სოფელში კი იმასაც ამბობენ, რომ შესაძლებელია, ვინმე ჩადგა მათ ცოდვაში, გაძარცვა და შემდეგ ხანძარი გააჩინაო. ექსპერტიზა ყველაფერს დაადგენს, სავარაუდოდ, მაგრამ ამათ რა ეშველებათ?
ადამიანებმა 100 წელზე მეტი იცოცხლეს და ავადმყოფობით კი არ გარდაიცვალნენ, ცეცხლში გამოიწვნენ…
მარო ამბობდა ხოლმე ხშირად, – ერთ დღეს დავიბადეთ და ერთ დღეს გვინდა სიკვდილიო და აუცხადდა საწყალს ეს ნატვრა.
შვილები ძალიან განიცდიან, თვითონაც უკვე საკმაოდ ასაკი აქვთ, უფროსი შვილი 70-ს გადაცილებულია. ვაჟი მთელი გულით ტიროდა, – რატომ დავუჯერე და დავტოვე აქ, ნეტავ, ძალით წამეყვანაო… თუმცა, ნოე უკვე ძალიან იყო მოსუსტებული და როგორც შვილებმა თქვეს, ყოველდღე ველოდებოდით ცუდ ამბავსო, მაგრამ ბედისწერა ასეთი ყოფილა და რა გინდა, რომ ქნა…”
წყარო – პრაიმტაიმი