„ქართული ოცნება-დემოკრატიული საქართველოს” აღმასრულებელი მდივანი ირაკლი კობახიძე აცხადებს, რომ გორის რაიონის სოფელ სობისში 45-ე უბანთან მომხდარი ინციდენტი „ნაციონალური მოძრაობის“ აქტივისტების პროვოცირებული იყო.
როგორც ირაკლი კობახიძემ აღნიშნა, ალბერტ მერებაშვილი, „ნაციონალური მოძრაობის“ მხარდამჭერის ბარი ბასიშვილის ზონდერ ჯგუფის წევრია.
„ალბერტ მერებაშვილი, რომელიც არის კინგბოქსიორი, სპორტსმენი და ბადრი ბასიშვილის ზონდერ დაჯგუფების ერთ-ერთი წევრი, მისული იყო საარჩევნო უბანთან. ეს ადამიანი გახლავთ თბილისის კუდ-ის ყოფილი უფროსის რევაზ შიუკაშვილის დის შვილი. თუ რა ტიპის ადამიანებთან გვაქვს საქმე, ეს კარგად წარმოაჩენს, მან მძიმე პროვოკაციაზე სცადა ჩვენი აქტივისტების წამოკიდება. ჩვენი აქტივისტები მობილიზებული იყნენ საარჩევნო უბანთან. მან სცადა შეურაცხყოფის მიყენება „ქართული ოცნების“ აქტივისტებისათვის. აქ საუბარი იყო გინებაზე ძალიან უწმაწური ფორმით იყო ეს ყველაფერი გამოხატული“, – განაცხადა კობახიძემ.
მისივე თქმით, ფიზიკური დაპირისპირება იყო ორმხივი და პირველად ალბერტ მერებაშვილმა დაარტყა „ქართული ოცნების“ აქტივისტს.
“ინციდენტის დროს დაშავდნენ ადამიანები როგორც ერთ, ისე მეორე მხარეს, მათ შორის დაშავდა ალბერტ მერებაშვილი. ამის შემდეგ მერებაშვილის მამა მივიდა ადგილზე, რომელიც შევიდა შელაპარაკებაში სამართალდამცავი ორგანოების წარმომადგენლებთან. მათ მიაყენა ფიზიკური შეურაცხყოფა და ამის საფუძველზე იმედი შიუკაშვილი არის დაკავებული სამართალდამცავი ორგანოების მხრიდან“, – განაცხადა კობახიძემ.
„ქართული ოცნების“ აღმასრულებელი მდივანი მოუწოდებს პარტიის აქტივისტებს, რომ არ წამოეგონ არც ერთ პროვოკაციას. მისივე თქმით, არსებობს ინფორმაცია, რომ სხვა ქალაქებსა და რაიონებშიც დაგეგმილია პროვოკაციების „ნაციონალური მოძრაობის“ წარმომადგენლებისგან.
„ბათუმში კონკრეტული გეგმები მზადდება, ჩვენი ამოცანაა მშვიდ გარემოში ჩატარდეს არჩევნები. არ აყვნენ პროვოკაციებს ჩვენი მხარდამჭერები“, – განაცხადა კობახიძემ.