7 თვის ორსულ თეონა აბაშიძეს, რომელიც კოვიდით გარდაიცვალა, რამდენიმე დღის წინ კორონავირუსით მამა გარდაეცვალა. მამა-შვილი ლაგოდეხში, სოფელ ჰერეთისკარში ცხოვრობდა.
ბოკერიას სახელობის კლინიკაში, სადაც თეონას მკურნალობდნენ, ამბობენ, რომ მდგომარეობა 13 აგვისტოდან დამძიმდა.
,,სამწუხაროდ, ქალბატონო არ იყო აცრილი და ამან თავისი საქმე გააკეთა, ცუდი როლი ითამაშა. თავდაპირველად, შემოსვლისას შეფასდა, როგორც სტაბილური მიმდინარეობა, მაგრამ დელტა შტამი აგრესიულობით გამოირჩევა ფეხმძიმეებში.
რაღაც დროის განმავლობაში შეინიშნა, რომ მას გაუჭირდა სუნთქვა და გახდა ჟანგბადდამოკიდებული. 12 აგვისტოს რეალურად დაგვიდგა საჭიროება, რომ გოგონას დავხმარებოდით ხელოვნური ვენტილატორით. რამდენიმე დღე მოხდა დასტაბილურება, მაგრამ, სამწუხაროდ, 13 აგვისტოს გადავიდა რეანიმაციაში და ვერანაირად ვერ მოხერხდა მისი სტაბილურობის გამყარება”, – თქვა კლინიკურმა დირექტორმა ალექსი ვაჩაძემ.
რაც შეეხება მამას, როგორც ,,ბათუმელები” წერს, ის კვირას დაკრძალეს.