„ქართული ოცნება“ ძალიან დინამურ და თანმიმდევრულ პოლიტიკასა და საარჩევნო კამპანიას ახორციელებს. „ნაციონალური მოძრაობისა“ და ოპოზიციის რეიტინგის ვარდნა გამოწვეულია იქიდან, რაც ოპოზიციამ თავად დამართა თავის თავს, – ამის შესახებ საპარლამენტო უმრავლესობის წევრმა, ირაკლი ქადაგიშვილმა განაცხადა.
„როდესაც მათ, პარლამენტში ჯამურად მაღალი შედეგი მიიღეს, მერე ეს შედეგი ქუჩაში მოისროლეს. მათ ვერ დაანახეს თავიანთ ამომრჩეველს, რომ პოზიტივისკენ მიმართული პოლიტიკური ძალები არიან, დაანახეს მხოლოდ, ის, რომ უშედეგო რევოლუციის მომხრეები არიან“, – განაცხადა ირაკლი ქადაგიშვილმა.
ტელეკომპანია „იმედის“ დაკვეთით საერთაშორისო ორგანიზაცია GORBI-ს მიერ ჩატარებული კვლევის შედეგები ცნობილია. კითხვაზე „დღეს რომ ქალაქ თბილისის მერის არჩევნები ტარდებოდეს, რომელ კანდიდატს მისცემდით ხმას“ გამოკითხულთა 61.4%-მა არჩევანი კახა კალაძეზე, ხოლო 38.6%-მა ნიკა მელიაზე შეაჩერა, ხოლო დღეს რომ ადგილობრივი თვითმმართველობის არჩევნები ტარდებოდეს, გამოკითხულთა 47,2% ხმას „ქართულ ოცნებას“ მისცემდა.