„რესპუბლიკური პარტიის“ ყოფილი წევრი დავით უსუფაშვილი პარტიიდან წასვლის მიზეზებზე საუბრობს და გავრცელებულ ინფორმაციას, პარტიაში მომხდარ დაპირისპირებასთან დაკავშირებით ჭორს უწოდებს.
როგორც უსუფაშვილი ირწმუნება, მასსა და პარტიის რომელიმე წევრს შორის, 2005 წლიდან აქამდე, დაპირისპირება არ მომხდარა.
„ეს არის ჭორი. მე 35 წელზე მეტია ვარ „რესპუბლიკურ პარტიაში“. აქტიური წევრი ვარ 2005 წლიდან და ამ ხნის განმავლობაში არასოდეს გვიჩხუბია მე და დათო ბერძენიშვილს ან ლევან ბერძენიშვილს. ერთმანეთთან ურთიერთობაში არასოდეს გადაგვილახავს ის ზღვარი, რაც არის ნორმალური დისკუსიისა თუ დებატებისთვის. ეს არის ჩემთვის ძალიან მნიშვნელოვანი, დასაფასებელი და გასაფრთხილებელი. გადაწყვეტილების მიღებისას სწორედ ამ საკითხს ვუფრთხილდებოდი. დღეს მე არ და ვერ გიპასუხებთ ყველა კითხვაზე, რომელიც ეხება პარტიაში განხილულ ნიუანსებს.
მე ვარ ამაყი, რომ ვიყავი „რესპუბლიკური პარტიის“ წევრი საქართველოსთვის ძალიან მძიმე დროს. პარტიასთან და პარტიის დამფუძნებლებთან ერთად, ვიყავი თანამონაწილე აქტიური პოლიტიკური ცხოვრებისა. ამით ვიამაყებ სიცოცხლის ბოლომდე, რადგან ღრმად მჯერა, რომ ამ ხნის განმავლობაში, თუ რომელიმე პოლიტიკურმა ჯგუფმა შეძლო ღირსეულად ეტარებინა ის პასუხისმგებლობა, რაც პოლიტიკურ პარტიას აკისრია, შეძლო გამკლავებოდა ძალიან ბევრ ქარტეხილს ამ ქვეყანაში, ეს იყო „რესპუბლიკური პარტია“. მინდა ვისურვო, რომ ეს პარტია გააგრძელებს მოღვაწეობას.
ჩემი გადაწყვეტილებაც, რომ დამეტოვებინა პარტია, ერთი მხრივ, განპირობებული იყო იმით, თუ როგორ ვხედავ, რა სჭირდება ქვეყანას უახლოეს ხანებში პოლიტიკურ სივრცეში.
არც დღეს და არც ხვალ არ და ვერ ვისაუბრებ იმ ნიუანსებზე და დეტალებზე, რომელიც არის შიდაპარტიული ცხოვრების დეტალები“, – განაცხადა უსუფაშვილმა ტელეკომპანია „ტვ პირველის“ პირდაპირ ეთერში.
უსუფაშვილის თქმით, სანამ იგი პარტიიდან წასვლის შესახებ ოფიციალურ განცხადებას გააკეთებდა, გუნდის წევრები საქმის კურსში ჩააყენა.