ოდესის გუბერნატორმა, მიხეილ სააკაშვილმა ელექტრონული ქონებრივი დეკლარაცია გამოაქვეყნა. დოკუმენტის მიხედვით, სააკაშვილი საქართველოში 6 820 და 500 კვ/მ-ის ნაკვეთებს ფლობს, ასევე მას 97 კვ/მ-ის ფართობის საცხოვრებელი სახლი ეკუთვნის.
ამის შესახებ გამოცემა „112 უკრაინა“ იუწყება. სააკაშვილი ნაღდი ფულის სახით 48 ათას ევროს ფლობს, ასევე მას Rolex Deepse და Hublot-ის საათები ეკუთვნის. ოფიციალური ინფორმაციით, მიხეილ სააკაშვილი ოდესაში 54 კვადრატული მეტრის ოთახით სარგებლობს, რომელიც მესამე მხარეს საკუთრებაშია.
2015 წელს მან ხელფასის სახით 38 601 (1514 აშშ დოლარი) გრივნა მიიღო. Societe General-ის საბანკო ანგარიშზე სააკაშვილი 57 ათას დოლარს ინახავს, ხოლო უკრაინის სახელმწიფო საბანკო ანგარიშზე 129 950 გრივნას (5,9 ათასი აშშ დოლარი). დეკლარაციის მიხედვით, სააკაშვილის მეუღლე სანდრა რულოვსი საქართველოში 280 კვადრატული მეტრის ფართობის ბინას ფლობს, ხოლო ბანკში 13 ათასი ევროს ინახავს.
ასევე დეკლარაციის მიხედვით, სააკაშვილის უმცროსი შვილის, ნიკოლოზის საბანკო ანგარიშზე 35 ათასი ევროა.