გივი ბერიკშვილი, შალვა ნათელაშვილის ხმაურიან პოსტს პასუხობს, სადაც, ნათელაშვილმა მას და კახი კავსაძეს ,,ხაშლამისტი ინტელიგენცია“ უწოდა.
,,ვერ გავიგე რას გვერჩის ეს კაცი, რა დავუშავეთ… არანაირი პირადი მტრობა მე ნათელაშვილთან არ მაკავშირებს. ის, რომ ბატონი ბიძინა ივანიშვილი ჩემს ნდობას იმსახურებს, მე მგონი სამართლიანია და ვერ ვხვდები, როგორ არ უნდა ვცე პატივი ადამიანს, რომელიც ქართულ თეატრს ამდენი წელია ფინანსურად ეხმარება. მე და კახი არ ვთვლით საჭიროდ ნათელაშვილისნაირ უვიც ადამიანს პასუხი გავცეთ, თუმცა მეც მაქვს მასთან კითხვა: ნათელაშვილო, შენ თეატრში ან ოპერაში საერთოდ ხარ ნამყოფი? შენი ინტელექტიდან გამომდინარე თუ ვიმსჯელებთ, არ უნდა იყო…
კახი კი ამბობს, მისთვისვეა უკეთესი, რომ ნათელაშვილი შემთხვევით ქუჩაში არ შემოხვდეს…“ – განაცხადა ბერიკაშვილმა ,,ჯორჯიან თაიმსთან“ საუბარში.
შეგახსენებთ, რომ ნათელაშვილმა, ფეისბუქის საკუთარ გვერდზე, არჩევნების მეორე ტურის დასრულების შემდეგ, ,,ქართული ოცნების“ ოფისთან მისული გივი ბერიკაშვილისა და კახი კავსაძის ფოტო გამოაქვეყნა შემდეგი წარწერით:
„აი ესაა ჩვენი უბედურება. ერის ინტელექტის მონოპოლიაზე პრეტენზიის მქონე ადამიანები მშიერი ტურებივით, რომ დადიან ყველა მმართველი პარტიის ოფისებში. აბა წარმოიდგინეთ, პიერ რიშარი,ჟან მარე, ბელმონდო , ფრენკ სინატრა, თუნდაც რუსეთში ალა პუგაჩოვა აყუდებულნი მმართველ ძალთა ოფისების წინ. ის კი არა, კონსტანტინ რაიკინმა ამას წინათ ამხილა პუტინის რეჟიმი ტოტალურ ცენზურაში. ელიტარული ინტელიგენცია, რაზედაც ამ ხაშლამისტებს აქვთ პრეტენზია თავისი ბუნებით, რევოლუციური, შეურიგებელი და ამაღლებული უნდა იყოს არსებულ რეალობაზე, მხოლოდ მაშინ, როცა გვექნება ჯანსაღი სახელმწიფო და საზოგადოება.
საერთოდ პოლიტიკური პარტიები, კაცობრიობის ისტორიაში უმცირესი გაელვებაა. სულ რაღაც, ორი საუკუნეა დაიწყო მათი ჩამოყალიბება. მანამდე პოლიტიკურ ფუნქციებს განსაკუთრებით ოპოზიციურს ასრულებდნენ სწორედ ერის ინტელექტუალური საზოგადო მოღვაწეები.
დიდი ილია საკუთარ ფენას,კლასს თავადაზნაურობას აუჯანყდა და იდეოლოგიურად დაამხო ისინი. თავად, აბა საქართველოც, თელი მეცხრამეტე საუკუნე პოლიტიკურად, რომანტიკოსების და თერგდალეულთა იდეებით დგებოდა ფეხზე და ვითარდებოდა, რომ დაეწყოთ ილიას , ვაჟას, აკაკის, მაჩაბელს, გიორგი ერისთავს და მთელ ამ პლეადას პირადი სარგებლისათვის ხელისუფლებებთან წანწალი, ხელი აეღოთ სახალხო,ეროვნულ იდეებზე რანი ვიქნებოდით დღეს, ან საერთოდ თუ ვიქნებოდით?!
აი , ამიტომაა რომ, გულს მიკლავს ასეთი კადრების ნახვა. თქვე, მამაცხონებულებო, ერთ მშვენიერ დღეს, ყველამ უარი რომ ვთქვათ ოპოზიციონერობაზე და თქვენთან ერთად მივადგეთ სამთავრობო სასახლეებს. თუ გიფიქრიათ, რა დაემართება იმ ქვეყანას, რომელსაც ასე მგზნებარებით იგონებთ სამეფო ნადიმისას სუფრებზე?”
www.mediamall.ge