სულხან მოლაშვილის ძმა თორნიკე მოლაშვილი ეხმიანება ვალერი გრიგალაშვილის განცხადებას – რომ სულხან მოლაშვილი იყო კორუმპირებული ჩინოვნიკი, მასზე წამება არ ხორციელდებოდა და მისი ჯანმრთელობის მდგომარეობის გაუარესება ნარკოდამოკიდებულების ბრალი იყო. მოლაშვილი „მარშალპრესში” გამართულ ბრიფინგზე ამბობს, რომ ვალერი გრიგალაშვილი თავად იყო კორუფციაში ჩაძირული და მას „საქართველოს სირცხვილს” უწოდებს.
„კორუფციაზე ვალერი გრიგალაშვილს სალაპარაკო არაფერი აქვს, თვითონ კორუფციაში ჩაძირული პიროვნებაა და ყველაფერი კორუფციით აქვს შეძენილი და რომ არ დააკავეს, ვალერი გრიგალაშვილმა მადლობა გადაუხადოს მიხეილ სააკაშვილს!
რაც შეეხება ნარკოტიკებს, სულხან მოლაშვილი ბოლო 4-5 წელი ქიმიას იკეთებდა, მას საფრანგეთის მთავრობა მკურნალობდა, როგორც პოლიტიკური ნიშნით დევნილს. ესე იგი, ციხეში იყენებდა ნარკოტიკებს? თუ ასე იყო, ვის შეჰქონდა ციხეში ნარკოტიკები? სააკაშვილის რეჟიმის დროს ნარკოტიკები შედიოდა ციხეში – წარმოგიდგენიათ, რას ლაპარაკობს ვალერი გრიგალაშვილი? მაგის კაცობა-არაკაცობაზე ლაპარაკი შორს წაგვიყვანს. ვალერი გრიგალაშვილი არის საქართველოს სირცხვილი, როგორც მიხეილ სააკაშვილი და მთელი „ნაციონალური მოძრაობა”, – განაცხადა თორნიკე მოლაშვილმა.