ნიკო კვარაცხელიას ოჯახმა დღეს საგანგებო განცხადება გაავრცელა.
როგორც კვარაცხელიას ოჯახი აცხადებს, რეალური მოტივის დაფარვის მიზნით, შესაძლოა, დამკვეთმა ბრალდებულების ლიკვიდაცია მოახდინოს.
ნიკა კვარაცხელიას ოჯახი ბრალდებულების ოჯახებს მიმართავს და აცხადებს, რომ რეალური მოტივის დაფარვის მიზნით არსებობს საფრთხე, რომ დამკვეთმა აკო ჭელიძის და გიორგი კავილაძის ლიკვიდაცია მოახდინოს
ვრცელდება ოჯახის ადვოკატის განცხადება, სადაც ის გარდაცვლილის მამასთან, გია კვარაცხელიასთან საუბარს იხსენებს.
ადვოკატი ამბობს, რომ ნიკოს მამასთან საუბარი მისთვის განსაკუთრებულად მძიმე იყო.
„ჩემთვის ძალიან მძიმე იყო ეს საუბარი. განსაკუთრებული მამა-შვილობა ჰქონდათ. წარმოიდგინეთ, ასეთი რამ მითხრა:
ნიკოს თხოვნით 58 წლის ასაკში ინგლისურის სწავლა დავიწყე, რადგან სურდა მისი დაგეგმილი პრეზენტაცია თარგმანის გარეშე მომესმინაო. სახელიც კი წამართვა, ახლა ყველა ნიკოს მამად მიცნობსო“. – ციტირებს გია კვარაცხელიასთან საუბარს ადვოკატი.
კითხვაზე, გამორიცხავს თუ არა გია კვარაცხელია მომხდართან დავით კაკულიების კავშირს, ადვოკატი პასუხობს, რომ გამორიცხული არაფერია, თუმცა კითხვაზე პასუხი არ აქვს.
შეგახსენებთ, რომ თბილისში, ანჯაფარიძის ქუჩაზე, 22 წლის ნიკა კვარაცხელიას მკვლელობის საქმეზე შინაგან საქმეთა სამინისტრო აკო ჭელიძესა და გიორგი კავილაძეს ეძებს.
მათ თბილისის საქალაქო სასამართლომ აღკვეთის ღონისძიების სახით პატიმრობა დაუსწრებლად შეუფარდა.
შსს-ს ინფორმაციით, ნიკა კვარაცხელიას მიმართ 10-ზე მეტი გასროლა განხორციელდა, სავარაუდო დამნაშავემ კი ტერიტორია თანამზრახველთან ერთად ნაქირავები მანქანით დატოვა.