საქართველოს პრეზიდენტი ვენაში ქართველ სტუდენტებს შეხვდა.
შეხვედრისას სტუდენტები პრეზიდენტს იმ საკითხების შესახებ ესაუბრნენ, რომლებსაც ისინი სწავლის პროცესში აწყდებიან.
საუბარი შეეხო სწავლის პროცესში სტუდენტებისთვის შექმნილ სირთულეებს, როგორიცაა წყაროებსა და დოკუმენტაციაზე წვდომის საკითხი. რაზეც, საქართველოს პრეზიდენტმა აღნიშნა, რომ სხვადასხვა ქვეყანასთან აღნიშნულ საკითხზე მუშაობა მიმდინარეობს, რათა ქართველ სტუდენტებსა და მკვლევრებს მიეცეთ შესაძლებლობა და ჰქონდეთ წვდომა იმ კონკრეტულ დოკუმენტაციასა და წყაროებთან დაკავშირებით, რომელიც მათ სჭირდებათ.
პრეზიდენტის განცხადებით, სტუდენტებმა შესაძლებელია გამოიყენონ საკუთარი ცოდნა და უნარები, რათა მოხდეს საქართველოს პოპულარიზაცია, მაგალითისათვის კი სალომე ზურაბიშვილმა ვიკიპედიაში საქართველოს შესახებ ორგანიზებულად ინფორმაციის განთავსება დაასახელა. მან აღნიშნა, რომ რაც უფრო მეტი სანდო და ვრცელი სტატია დაიდება ვიკიპედიაში სხვადასხვა ენაზე, მით უფრო გაიზრდება საქართველოს ცნობადობა და მოხდება მისი კულტურისა და ისტორიის პოპულარიზაცია.